ەلىمىزدىڭ كيەلى جەرلەرىن ناسيحاتتاپ، وسكەلەڭ ۇرپاققا ولكەنىڭ باي تاريحىن، تاۋەلسىزدىكتىڭ جەتىستىكتەرىن تانىستىرۋ ماقساتىندا ءبىرقاتار يگى باستاما قولعا الىنعانى بەلگىلى. وسى ورايدا سەمەيدەگى فيزيكا-ماتەماتيكا باعىتىنداعى نازاربايەۆ زياتكەرلىك مەكتەبىنىڭ وقۋشىلارى اقتوبە قالاسىندا بولىپ قايتتى دەپ حابارلايدى Qamshy.kz اقپارات اگەنتتىگى.  

«رۋحاني جاڭعىرۋ» باعدارلاماسى اياسىنداعى ساپار بارىسىندا بالالار اقتوبەدەگى تاريحي-مادەني، الەۋمەتتىك-ەكونوميكالىق ماڭىزى بار نىسانداردى ارالاپ، جاقىن تانىستى. اۋەلى ولار اقتوبەدەي ساۋلەتتى دە كوركەم شاھاردىڭ كورىكتى جەرلەرىن كوزبەن كورىپ، قالا تۋرالى، جەرگىلىكتى جەردەن شىققان اتى الاشقا ءمالىم بەلگىلى تۇلعالار تۋرالى تىڭ اقپاراتتارعا قانىقتى.  

قالاداعى ۇلى وتان سوعىسىنىڭ ارداگەرلەرىنە ارنالعان «ءاليا» اللەياسىنا ات باسىن بايلاعان سەمەيلىك وقۋشىلار مەرگەن قىزدىڭ ءومىرى مەن مايدانداعى ەرلىگى جونىندە ءبىلىپ، ەسكەرتكىشكە گۇل شوقتارىن قويىپ، باتىر رۋحىنا تاعزىم ەتتى.   

    سونىمەن قوسا «شىعارماشىلىق سارايى»، «تەننيس الاڭى»، «مۇز ايدىنى» كەشەندەرىن، قالالىق اتشاباردى، «جەكپە-جەك» سپورت سارايىن، «اتامەكەن» بيزنەس ورتالىعىن جانە باسقا دا نىسانداردى ارالاپ، وزدەرىنىڭ زەرتتەۋ جۇمىستارىنا قاجەتتى مول اقپارات الدى. 

– ەكسپەديسيا وتە قىزىقتى بولدى. اسىرەسە، ەرەكشە ەستە قالعانى قوبدا اۋدانىنا بارعان ساپارىمىز. بۇل اۋداندا ەسىمى ەلگە تانىس ۇلى ادامدار تۋعان. سولاردىڭ ءبىرى قازاقتىڭ باتىر قىزى ءاليا مولداعۇلوۆا. ساپار اياسىندا ءبىز ءاليا اپامىزدىڭ تۋعان «ءاليا» پاتريوتتىق تاربيە بەرۋ ورتالىعىنا باردىق. كوپتەگەن تاريحي دەرەكپەن تانىستىق، – دەيدى نازاربايەۆ زياتكەرلىك مەكتەبىنىڭ وقۋشىسى ارۋجان ساربييەۆا. 

بۇدان بولەك سەمەيلىك وقۋشىلار اقتوبە ولىسىنداعى قۇندى تاريحي نىسان – «ابات بايتاق» كەسەنەسىندە، «قىز-اۋليە» قورىمىندا، جيرەنقوپا جەرىندەگى قوبىلاندىنىڭ  تاريحي-مەموريالدىق كەشەنىندە، وسىدان ەكى جىل بۇرىن پايدالانۋعا بەرىلگەن «اناعا تاعزىم» ورتالىعىندا بولىپ، جازۋشى ت.احتانوۆ اتىنداعى تەاتردا «ماحاببات جاعالاۋى» اتتى پسيحولوگيالىق درامانى تاماشالادى.