ولەڭ-جىرعا سۋساپ، ءان مەن كۇيگە شولەركەپ وتىرعان اۋىل جۇرتى ءبىر سەرپىلىپ قالدى. «رۋحاني جاڭعىرۋ» باعدارلاماسى اياسىندا ارنايى جولعا شىققان زيالى قاۋىم وكىلدەرى ءوڭىردىڭ اۋداندارىن ارالاپ، اۋىل حالقىمەن ساليقالى كەش وتكىزىپ قايتتى دەپ حابارلايدى Qamshy.kz اقپارات اگەنتتىگى.  

تىڭدارمانىن ورەلى ولەڭىمەن، جۇرەك تەربەتەر ان-جىرىمەن باۋراپ العان توپ قۇرامىندا قازاقستان جازۋشىلار وداعى شىعىس قازاقستان وبلىستىق فيليالىنىڭ ديرەكتورى، جازۋشى، جۋرناليست الىبەك قاڭتاربايەۆ، قازاقستان جۋرناليستەر وداعىنىڭ مۇشەسى، حالىقارالىق، رەسپۋبليكالىق جىر دودالارىنىڭ جەڭىمپازى، بەلگىلى ايتىس اقىنى سەرىك قۇسانبايەۆ، وبلىستىق فيلارمونيانىڭ ءانشىسى قايرات مايجاروۆ سىندى ادەبيەت پەن ونەر مايتالماندارى بولدى. 

– اۋدان، اۋىلداردى ارالاپ، كەزدەسۋلەر وتكىزگەندە ءبىر بايقاعانىم، ەل ءىشى رۋحاني دۇنيەگە راسىمەن دە شولەركەپ قالىپتى. ءاربىر ايتىلعان اڭگىمەنى ىنتاسىمەن تىڭداپ، سۇراقتارىن قويىپ، اۋەلەگەن انمەن بىرگە قاناتتانىپ وتىردى. جالپى، ءسوز ءقادىرىن اۋىلداعى قازاقتان ارتىق ەشكىم تۇسىنبەيتىنى انىق قوي. ەندەشە ءبىزدىڭ بۇل ساپارىمىز ءوزىنىڭ جەمىسىن بەردى دەپ ويلايمىن، – دەيدى سەرىك قۇسانبايەۆ. 

اقىن-جازۋشىلار مەن ونەر ساڭلاقتارىنان قۇرالعان ارنايى توپ شىعىس قازاقستاننىڭ التاي، كاتونقاراعاي، كۇرشىم، تارباعاتاي، زايسان، كوكپەكتى، جارما، اياگوز، ءۇرجار، اباي، بەسقاراعاي، ۇلان، گلۋبوكوە سياقتى ءبىرقاتار اۋدانىن ارالاپ، اۋىل تۇرعىندارىمەن كەزدەسۋلەر وتكىزدى. كەزدەسۋ بارىسىندا ونەر، رۋحانيات، ادەبيەت تاقىرىبىنان بولەك جاستار تاربيەسى، ۇلتتىق قۇندىلىقتار، ءسالت-داستۇر جانە باسقا دا تاقىرىپتار توڭىرەگىندە اڭگىمە ءوربىدى. 

– مۇنداي رۋحاني كەشتەر اۋىل جۇرتىنا قاجەت. كۇندەلىكتى كۇيبەڭ تىرلىكتەن ءبىر ۋاقىت ارىلىپ، اقىن-جازۋشىلاردىڭ اڭگىمەسىن تىڭداپ ءبىر مارقايىپ قالدىق. اسىرەسە، جاستارىمىز ءۇشىن بۇل ءبىر تاعىلىمدى شارا بولدى، – دەيدى كۇرشىم اۋدانىنىڭ تۇرعىنى قۋاتبەك قازىبەك ۇلى.