بۇگىن تۇركىستان وبلىسىنىڭ اكىمى ءومىرزاق شوكەيەۆ اپتالىق اپپاراتتىق ءماجىلىستى ارىس قالاسىندا وتكىزدى. جيىندا ارىس قالاسىن قالپىنا كەلتىرۋ ماسەلەسى تالقىلانىپ، جۇمىستار تالقىلاندى. ءوڭىر باسشىسى قىسقا مەرزىمدە ارىس قالاسىن قالپىنا كەلتىرۋ، تۇرعىندارعا جاعداي جاساۋ باعىتىنداعى بارلىق ماسەلەنى تالقىلاپ، وسى جاۋاپتى مىندەتتى وتانشىلدىقپەن، جاناشىرلىقپەن اتقارۋ كەرەكتىگىن ايتتى.

«مەن وسىندا 1 اي بولىپ قۇرىلىستى كۇندە باسىندا تۇرىپ قاداعالايمىن. ەگەر قاي اۋدان ۇيىمداستىرا الماسا، جاۋاپتىسىن جۇمىستان بوساتامىن. ال جاۋاپتى وبلىستار مەن قالالار سالعىرتتىق تانىتسا، ۇكىمەت باسشىسىنا مالىمدەيمىن. حالىقتىڭ مۇقتاجىن جەدەل شەشۋىمىز كەرەك»، – دەگەن اكىم 17 سەكتوردىڭ جۇمىسىن جانداندىرۋ جونىندە تاپسىرما بەردى.

ءاربىر سەكتوردىڭ جۇمىسىن ءوڭىر اكىمدەرىنىڭ جانە اۋدان، قالا اكىمدەرىنىڭ ورىنباسارلارى جانە ارىس قالاسىنان ءبىر جاۋاپتى وكىل، جالپى سانى 51 ادام ۇيلەستىرەدى. جەكە-جەكە شتاب قۇرىپ، ۇيلەردىڭ قۇرىلىسى، گۋمانيتارلىق كومەك تاراتۋ، قاۋىپسىزدىكتى ساقتاۋ، قالانى تازارتۋ، تۇرعىنداردى اقپاراتتاندىرۋ جانە وزگە دە ماسەلەلەر بويىنشا كۇن سايىن مالىمەت بەرىپ وتىرادى.

اپپارات ماجىلىسىندە اتىراۋ، قاراعاندى، جامبىل، ماڭعىستاۋ، شقو وبلىستارى جانە نۇر-سۇلتان قالاسى اكىمىنىڭ ورىنباسارلارى مەن جاۋاپتى وكىلدەرىنىڭ مالىمەتتەرى تىڭدالدى. «سامۇرىق-قازىنا» ءال-اۋقات قورى مەن ق ر «اتامەكەن» ۇلتتىق كاسىپكەرلەر پالاتاسىنىڭ جاۋاپتى وكىلدەرى دە وزدەرىنە تاپسىرىلعان جۇمىستاردىڭ بارىسى تۋرالى باياندادى. اۋدان اكىمىنىڭ ورىنباسارلارى دا وزدەرىنە جۇكتەلگەن اۋماق بويىنشا ەسەپ بەردى.

بۇگىندە ارىس قالاسىنداعى ۇيلەردى تەكسەرۋ، قۇرىلىس نىساندارىنىڭ جوبالىق-سمەتالىق قۇنىن ەسەپتەۋ جۇمىستارى جۇرگىزىلىپ جاتىر. كەيبىر ۇيلەردىڭ تەرەزەلەرى اۋىستىرىلا باستاعان. بارلىق سەكتور بويىنشا ۇيلەردى تەكسەرۋ، اكت تولتىرۋ جۇمىستارى اياقتالۋعا جاقىن. مەردىگەرلەر انىقتالىپ، قۇرىلىس بريگادالارى جاساقتالعان.

وبلىس اكىمى ءومىرزاق شوكەيەۆ قالاداعى كوپقاباتتى ۇيلەردىڭ شاتىرلارى، سىرتقى كورىنىسى جيناقى ءارى بىركەلكى بولۋ كەرەكتىگىن ەسكەرتتى. ازىق-تۇلىك ۇلەستىرۋ جانە وزگە دە جۇمىستاردى ۇيلەستىرۋگە جەرگىلىكتى بەلسەندى تۇرعىنداردى تارتۋدى تاپسىردى. سونىمەن بىرگە جيىندا قالانى اۋىز سۋمەن، ەلەكتر قۋاتىمەن ۇزدىكسىز قامتۋ، بالالاردى دەمالىس ورىندارىنا جىبەرۋ، ءورت قاۋىپسىزدىگىن ساقتاۋ، اتاۋلى الەۋمەتتىك كومەكتەردى ۋاقتىلى اۋدارۋ ماسەلەلەرى دە تالقىلانىپ، ناقتى جوسپارلار جاسالدى.