وتكەن اپتانىڭ سوڭىندا ءباا-نىڭ پرەمەر-مينيسترى، ميللياردەر شەيح  مۇحاممەدا يبن راشيد ال ماكتۋمنىڭ التىنشى ايەلى قاشىپ كەتكەنىن جارىسا جازعان ەدى. حاييا ال حۋسسەين جاي عانا قاشىپ كەتپەدى. وزىمەن بىرگە 11 جاستاعى قىزى مەن 7 جاسار ۇلىن جانە جاڭا ءومىر باستاۋ ءۇشىن 40 ملن دوللارىن الىپ كەتتى. ونىڭ قاشىپ كەتۋىنە نەمىس ديپلوماتى كومەكتەسكەنى انىقتالدى. 

ءبۇتىن ەلدى باسقارىپ وتىرعان شەيحتى "لاقتىرىپ" كەتكەن ايەل تۋرالى قىزىقتى دەرەكتەردى Qamshy.kz اقپارات اگەنتتىگى وقىرمان نازارىنا ۇسىنادى. 

حاييا بينت ال-حۋسەين 1974 جىلى 3 مامىردا يوردانيادا دۇنيەگە كەلگەن. ول يوردانيانىڭ بۇرىنعى كارولى حۋسەين يبن تالالانىڭ 11 بالاسىنىڭ ءبىرى، قازىرگى كارولدىڭ تۋعان اپكەسى. سونداي-اق حاييا بينت ال-حۋسەين مۇحاممەد پايعامباردىڭ تىكەلەي ۇرپاعى ەكەن. 

ول 2 جاستا بولعان كەزدە ونىڭ اناسى، يوردانيانىڭ پاتشايىمى اليا جول اپاتىنان قايتىس بولدى. ءسويتىپ كىشكەنتاي حانشايىم اكەسىنىڭ تاربيەسىن كورەدى. كارول ۇنەمى ءوزىنىڭ 5 قىزىنا كوپ كوڭىل بولەدى. كارول حۋسەين ەمالىس كۇندەرىندە كۇنى بويى قىزدارىنىڭ قاسىنان تابىلادى. 

يوردانيانىڭ حانشايىمى 2004 جىلى 10 ساۋىردە  مۇحاممەدا يبن راشيد ال ماكتۋمعا تۇرمىسقا شىعادى. التىنشى ايەلى بولعان حانشايىم 2007 جىلى قىزدى بولادى. ونىڭ تۋعان كۇنى ءباا-نىڭ تاۋەلسىزدىك كۇنىمەن سايكەس كەلگەن.  

يوردانيالىق حانشايىم ءوزىنىڭ بىلىمدىلىگىمەن، سپورتقا قۇمارلىعى جانە سۇلۋلىعىمەن باتىس پەن شىعىس حالقىن ءتانتى ەتكەن. ول شىعىس ەلدەرىندەگى ەڭ ىقپالدى ايەلدەردىڭ ءبىرى. وعان "اشتىقپەن كۇرەسكەن قاھارمان" دەگەن اتاق بەرگەن. 

حانشايىم حاييا يوردانياداعى باستاۋىش ءبىلىمىن جانە انگلياداعى ورتا جانە جوعارى ءبىلىمىن الدى، ول قىزدارعا ارنالعان Badminton (Badminton School) ينتەرناتىندا وقىدى. حانشايىم فرانسۋز، ورىس، اعىلشىننان باسقا 3 ءتىلدى بىلەدى.

تۇرمىس قۇرعان سوڭ دا حانشايىم قايىرىمدىلىق شارالارىن ءجيى ۇيىمداستىرىپ جۇرەتىن. ول يوردانيادا اشتىققا قارسى كۇرەسكە باعىتتالعان "Tikyet Um Ali" اتتى العاشقى اراب بەيرەسمي  ۇيىمىن (ءومىر ءسۇرۋ ءۇشىن تاماق ءىشۋ — رەد.) قۇردى. قازىرگى ۋاقىتتا الەمدەگى ەڭ ءىرى توتەنشە جاعدايلاردىڭ الدىن الۋ ورتالىعى بولىپ تابىلاتىن دۋباي حالىقارالىق گۋمانيتارلىق قالاشىعىنىڭ (International Humanitarian City) ءتوراعاسى. 

شەتەلدىك باق-تىڭ دەرەگىنە سۇيەنسەك، ءقازىر يوردانيانىڭ حانشايىمى گەرمانيادان پانا سۇراپ ءجۇر. سونداي-اق شەيحپەن اجىراسۋعا قۇجاتتارىن دايىنداپ جاتقان كورىنەدى. حانشايىمنىڭ قاشىپ كەتىپ، گەرمانيادان پانالاۋى ءباا مەن گەرمانيانىڭ ديپلوماتيالىق داعدارىستىڭ ورناۋىنا اكەلىپ سوقتى. ءباا-نىڭ شەيحى ايەلىن ەلگە قايتارۋىن گەرمانيادان تالاپ ەتكەن. الايدا گەرمانيا بيلىگى بۇدان باس تارتتى.