حالىققا قىزمەت كورسەتۋ ورتالىقتارىنداعى ۇزىن-سونار كەزەكتىڭ سەبەبى بەلگىلى بولدى دەپ حابارلايدى Qamshy.kz اقپارات اگەنتتىگى كتك تەلەارناسىنا سىلتەمە جاساپ.

ىشكى ىستەر مينيسترلىگى كولىكتەردى راسىمدەۋ مەن جۇرگىزۋشى كۋالىگىن بەرۋدى ورتالىقتان باقىلاۋ ءۇشىن 1 شىلدەدەن باستاپ ۆەب-مودۋل ەنگىزگەن بولاتىن. الايدا وتاندىق كومپانيا وندىرگەن كومپيۋتەرلىك باعدارلامادا اقاۋ كەتىپ، اپتاپ ىستىقتا جۇرت مامانداندىرىلعان قىزمەت كورسەتۋ ورتالىعىندا سەڭدەي سوعىلىسىپ ءجۇر.

1 شىلدەدەن باستاپ كەزەكتى رەفورمانى قولعا العان ىشكى ىستەر مينيسترلىگى جاڭاشىلدىققا دايىن بولماي شىقتى. سوڭعى ەكى تاۋلىكتە ەلىمىزدىڭ تۇپكىر-تۇپكىرىندەگى كولىك جۇرگىزۋشىلەرى حالىققا قىزمەت كورسەتۋ ورتالىقتارىندا سابىلىپ ءجۇر. ماماندار ءتيىستى قۇجاتتى قابىلداعانىمەن جاۋاپتى ۆەدوموستۆانىڭ اقپاراتتىق بازاسى باياۋ جۇمىس ىستەۋدە. كولىگىن تىركەتىپ نەمەسە جۇرگىزۋشى كۋالىگىن اۋىستىرۋعا كەلگەن جۇرت ساعاتتاپ كەزەكتە تۇرۋعا ءماجبۇر، دەپ حابارلادى 

الماتىداعى مامانداندىرىلعان حالىققا قىزمەت كورسەتۋ ورتالىعىندا ادام ءنوپىرى كوپ. زالدا دا، سىرتتا دا وتىراتىن جوق. بار شارۋاسىن كەيىنگە ىسىرىپ، ورتالىقتى توراۋىلداپ جۇرگەندەردىڭ بارلىعى – كولىك جۇرگىزۋشىلەرى. ءبارىنىڭ تاعاتى تاۋسىلسا دا قاس-قارايعانشا جۇرۋگە دايىن.

"كولىگىمدى ساتىپ ەدىم. قۇجاتتارىن راسىمدەي الماي جاتىرمىن. نە ايتپايدى، نە بەرمەيدى. ەلدى جيناپ قويىپ وتىر"، - دەيدى الماتى قالاسىنىڭ تۇرعىنى اسقار وسكەنبايەۆ.

ال تاعى ءبىر قالا تۇرعىنى ەرمەك الدەكوۆ جۇرگىزۋشى كۋالىگىن اۋىستىرۋعا كەلگەن.

"تاڭعى ساعات 7-دەن بەرى تۇرمىز"، - دەپ شاعىمداندى ول.

كەشەدەن باستاپ ىشكى ىستەر مينيسترلىگى جۇرگىزۋشى كۋالىگىن بەرەتىن تىركەۋ-ەمتيحان بولىمىندەگى قىزمەتىن حالىققا قىزمەت كورسەتۋ ورتالىقتارىنداعى ماماندارعا وتكىزدى. ياعني الداعى ۋاقىتتا "ازاماتتارعا ارنالعان ۇكىمەت" مەملەكەتتىك كورپوراسياسىنىڭ ماماندارى جۇرگىزۋشى كۋالىگىن الۋشىلاردان تەوريالىق جانە تاجىريبەلىك ەمتيحانداردى قابىلدايدى دەگەن ءسوز. الايدا، كولىكتى تىركەۋ مەن جۇرگىزۋشى كۋالىگىن بەرۋ ءىسى ىشكى ىستەر مينيسترلىگىنىڭ قۇزىرىندا قالادى.

"ەمتيحان، تىركەۋ بولىمدەرى بولەك جۇمىس ىستەيدى. ياعني ەلەكتروندى تۇردە. بەگ وفيس پەن فرونت-وفيس اراسىندا الشاق قىزمەت كورسەتەمىز. وسىعان وراي اقپاراتتىق قىزمەت كورسەتۋ جۇيەسى باياۋ ىستەپ جاتىر. ءبىراق بىرتە-بىرتە قالپىنا كەلىپ جاتىر، - دەپ ءتۇسىندىردى الماتى قالاسى مامانداندىرىلعان حالىققا قىزمەت كورسەتۋ ورتالىعىنىڭ باسشىسى ساكەن بايعالييەۆ.

وسىلايشا قاشىقتىقتان باسقارىلاتىن شارۋا الماتىنى عانا ەمەس، ەلىمىزدىڭ ءار تۇكپىرىندەگى جۇرگىزۋشىلەردى ابىرگەرگە سالۋدا. دەرەكتەر بازاسىنداعى اقاۋ وسكەمەندىكتەردىڭ دە ءتوزىمىن تاۋىستى. تالون بەرىلمەگەندىكتەن تۇرعىندار پاراققا اتى-جوندەرىن جازىپ ءتىزىم قۇرعان. الايدا ونىڭ جىلجيتىن ءتۇرى جوق.

"كەشەدەن بەرى وسىندامىز. 200 ادام جازىلدى. قولىمداعى تىزىمگە قاراڭىز. جاۋاپتىلار بولسا قاجەتتى باعدارلامانى بۇگىن ورناتىپ ءجۇر. نەگە الدىن-الا دايىندالمايدى؟ كۇن ىستىقتا ابىگەرگە تۇستىك"، - دەيدى وسكەمەن قالاسىنىڭ تۇرعىنى ساۋلە ءشارىپوۆا.

جۇرگىزۋشى كۋالىگىن بەرۋ مەن كولىك قۇرالدارىن تىركەۋگە پوليسيانى مۇلدەم ارالاستىرماي، جەمقورلىقتى جويۋعا كىرىسكەن مينيسترلىك بولعان كەلەڭسىزدىكتى جاقىن ارادا جويامىز دەپ سەندىرىپ وتىر.