ەلورداداعى "حان شاتىر" ويىن-ساۋىق ورتالىعىندا "بەكزات" كوركەم ءفيلمىنىڭ جابىق كورسەتىلىمى ءوتتى دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.
ءفيلمدى كورۋگە بەكزات ساتتارحانوۆتىڭ اتا-اناسى، اقپارات جانە قوعامدىق دامۋ ءمينيسترى داۋرەن ابايەۆ، مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتىنىڭ ءتوراعاسى سەرىك ساپييەۆ، "حابار" اگەنتتىگى" اق باسقارما ءتوراعاسىنىڭ ءبىرىنشى ورىنباسارى رينات كەرتايەۆ كەلدى.
"بەكزات" كوركەم ءفيلمىنىڭ رەجيسسەرى – مۇرات بيدوسوۆ، سەناريي اۆتورى – سەرجان زاكەر ۇلى. كينوكارتينا "حابار" اگەنتتىگىنىڭ تاپسىرىسىمەن تۇسىرىلگەن.
"حابار" تەلەارناسىنىڭ باس پروديۋسەرى ايدوس تۇرىسبەكتىڭ ايتۋىنشا، "بەكزات" ءفيلمى تۇركىستان، شىمكەنت، تاراز قالالارىندە جانە شەتەلدە ءتۇسىرىلىپتى.
"بەكزات ساتتارحانوۆتىڭ اناسى سىرلىكۇل ادىربەك قىزى جۋرناليستەرگە بالاسى تۋرالى فيلم تۇسىرىلگەنىنە قۋانىشتى ەكەنىن جەتكىزدى.
"بۇگىن – مەنىڭ تۋعان كۇنىم. ءفيلمنىڭ تۇساۋكەسەرى تۋرا وسى كۇنگە سايكەس كەلىپتى. بۇل – قۋانىشتى جاعداي. بالامىز تۋرالى تۇسىرىلگەن ءفيلمنىڭ تۇساۋكەسەرىنە كەلدىك. كينو ءساتتى ءتۇسىرىلدى دەپ ويلايمىن. فيلمگە باعانى حالىق بەرەدى. وسى كينونى تۇسىرگەن ازاماتتارعا العىس ايتامىن"، - دەيدى انا.
ال بەكزاتتىڭ اكەسى سەيىلحان ساتتارحان ۇلى تۋرالى تۇسىرىلگەن فيلمگە حالىقتىڭ كوپ كەلەتىنىنە سەنىمدى.
"بەكزاتتىڭ كينوسى دەسە، بارلىعى كەلەتىنىن بىلەمىن. ءبىراق ول ساپالى ءتۇسىرىلۋى قاجەت"، - دەيدى اكە.
ءفيلمدى تۇسىرۋگە قانشا قارجى كەتتى؟
"حابار" اگەنتتىگى" اق باسقارما ءتوراعاسىنىڭ ءبىرىنشى ورىنباسارى رينات كەرتايەۆ فيلمگە قانشا قارجى بولىنگەنى تۋرالى ايتا المايتىنىن جەتكىزدى.
"ارينە، بۇدان ۇلكەن دەڭگەيدە الەمدىك كينو پروكاتقا شىعاراتىن ساپادا فيلم تۇسىرۋگە بولادى. ءبىراق ءبىز وتاندىق سەريالداردى جاساۋعا ارنالعان اۋقىمدا ساپالى دۇنيە جاساۋعا تىرىستىق. كەلىسىمشارتقا سايكەس، كينونىڭ ناقتى بيۋدجەتىن ايتا المايمىن. ءبىراق قىمبات، سۋپەر بيۋدجەتتى جوبا دەپ تە ايتا المايمىن"، - دەدى ول.
"بەكزات" ءفيلمى قاشان كورسەتىلەدى؟
سونىمەن قاتار رينات كەرتايەۆ بۇل ءفيلمدى قالىڭ كورەرمەن قاشان كورە الاتىنىن ايتتى.
"بۇيىرتسا، وسى جىلدىڭ قازان ايىندا "بەكزات" ءفيلمى كينوتەاترلاردان كورسەتىلەدى. وعان دەيىن نۇر-سۇلتان، تۇركىستان، شىمكەنت قالالارىندا اشىق كورسەتىلىم جاساۋ جوسپاردا بار. ال سەريال رەتىندەگى نۇسقاسىن كورەرمەندەر 2019 جىلدىڭ 16 جەلتوقسانى – تاۋەلسىزدىك كۇنى "حابار" تەلەارناسى مەن "حابار" اگەنتتىگىنە قاراستى ارنالاردان كورە الادى"، - دەدى باسقارما ءتوراعاسىنىڭ ءبىرىنشى ورىنباسارى.
بەكزات ساتتارحانوۆ تۋرالى نە بىلەمىز؟
بەكزات ساتتارحانوۆ 1980 جىلى 4 ساۋىردە تۇركىستان قالاسىندا دۇنيەگە كەلگەن.
بىلعارى قولعاپ شەبەرى 2000 جىلى 20 جاسىندا وليمپيادا چەمپيونى اتانعان. سول جىلى 31 جەلتوقساندا جاڭا جىلعا 15 مينۋت قالعاندا شىمكەنت قالاسى ماڭىنداعى تەمىرلان بەكەتىندە بەكزات جول اپاتىنان قازا تاپتى.
اۋەسقوي بوكستا قازاقستاندىق سپورتشى 143 جەكپە-جەك وتكىزىپ، 132 كەزدەسۋىندە جەڭىسكە جەتكەن.
پىكىر قالدىرۋ