ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ جارىلىستان زارداپ شەككەن ارىس قالاسى ءبىر اي ىشىندە قالپىنا كەلەتىنىن ايتتى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.

"اپات ايتىپ كەلمەيدى عوي. وتە قيىن جاعداي. عيماراتتاردىڭ 85 پايىزى زاقىمدالعان، اسىرەسە، تەرەزەلەر، شاتىرى مەن ەسىكتەرى. قورقىنىشتى كورىنىس"، - دەدى مينيستر ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.

ساپاربايەۆ پرەمەر-مينيستر مەن مينيسترلەر الەۋمەتتىك نىسانداردى – مەكتەپ، بالاباقشا، اۋرۋحانالاردى ارالاپ شىققانىن اتاپ ءوتتى.

"قالا 17 سەكتورعا بولىنگەن، ولارمەن قازاقستاننىڭ 17 ءوڭىرى جۇمىس ىستەپ جاتىر. ءقازىردىڭ وزىندە 100-گە تارتا تۇرعىن ءۇي قالپىنا كەلتىرىلدى. ابدەن قيراعان ۇيلەردىڭ تۇرعىندارى مەكتەپكە ورنالاستىرىلدى، مەن وندا ءوزىم بولىپ قايتتىم. 800 ادامعا ارنالعان ورىن بار، بارلىق جاعداي جاسالعان"، - دەپ سەندىردى ۆەدومستۆو باسشىسى.

ءمينيستردىڭ سوزىنە سەنسەك، بارلىق ءىرى نىساندى قالپىنا كەلتىرۋ جۇمىسى "سامۇرىق-قازىنا"، ERG، "قازاقمىس"، "قازمىرىش" ج ش س سەكىلدى ءىرى كومپانيالارعا جۇكتەلگەن.

"بىردەن سۋ مەن جارىق بەردى، جول جاقسى. ەشقانداي رادياسيا جوق. ءقازىر قالانى قالپىنا كەلتىرۋ پروسەسى ءجۇرىپ جاتىر. ارىس ءبىر اي ىشىندە قالپىنا كەلەدى دەپ ويلايمىز"، - دەدى ساپاربايەۆ.

مينيستر ارىستىقتارعا كومەك قورىنا جينالعان اقشانىڭ ءار تيىنى ورنىمەن جۇمسالاتىنىنا سەندىردى. سونداي-اق، ول ارىس تۇرعىندارىنىڭ شىمكەنتتە باس كوتەرۋىنە قاتىستى دا توقتالدى.

"سىزدەر بىلەسىزدەر، ولار ءبىر رەت جينالدى. شىمكەنت جانە تۇركىستان وبلىسىنىڭ اكىمدەرىمەن ول جەرگە باردىق. ارىستىقتاردىڭ تالابى مىناداي بولدى: "ءبىز وسىندا قالعىمىز كەلەدى، شىمكەنتتەن پاتەر نەمەسە جەر بەرىڭىزدەر، تاعىسىن تاعى. ءبارىن ءتۇسىندىرىپ، اڭگىمەلەسكەننەن كەيىن، ولار تارادى"، - دەدى مينيستر.