تۇركىستان وبلىسىنىڭ اكىمى ءومىرزاق شوكەيەۆتىڭ توراعالىعىمەن ارىس قالاسىن سيفرلاندىرۋ ماسەلەسى بويىنشا ءماجىلىس ءوتتى دەپ حابارلايدى Qamshy.kz اقپارات اگەنتتىگى تۇركىستان وبلىسى اكىمى باسپا ءسوز قىزمەتىنىڭ مالىمەتتەرىنە سۇيەنىپ.
وبلىستىق تۇركىستان وبلىسىنىڭ اقپاراتتاندىرۋ، مەملەكەتتىك قىزمەتتەر كورسەتۋ جانە ارحيۆتەر باسقارماسىنىڭ باسشىسى ەلنۇر ۋتەبايەۆتىڭ ايتۋىنشا، ارىس قالاسىن سيفرلاندىرۋ بويىنشا جۇمىستار جۇرگىزىلىپ جاتىر.
جۋىردا 17 سەكتورعا بولىنگەن قالانىڭ 3D كارتاسى جاسالدى. بۇل كارتاعا قالاداعى تۇرعىن ۇيلەر مەن سول ۇيلەرگە تىركەلگەن ءۇي يەلەرى تۋرالى دەرەكتەر ەنگىزىلگەن. وعان قوسا قالالىق كاداسترعا ەنگىزىلمەگەن ۇيلەر دە انىقتالعان. وسىعان بايلانىستى وبلىس اكىمى بارلىق تۇرعىندى قۇجاتتاندىرۋ جونىندە تاپسىرما بەردى.
وسى كارتا ارقىلى ارىس قالاسىندا بولعان توتەنشە جاعدايعا بايلانىستى كومەك كورسەتۋ جەڭىلدەي ءتۇستى. ءار ۇيگە دەفەكتىك اكت تىركەلىپ، وسى ۇيلەردەگى قۇرىلىس جۇمىستارى، گۋمانيتارلىق كومەكتىڭ جەتكىزىلۋى باقىلانادى. قالا تۇرعىندارى بۇل جۇمىستاردى ونلاين رەجيمدە باقىلاپ، كەمشىلىكتەر انىقتالسا، ءتيىستى ورىندارعا حابار بەرەدى.
سونىمەن بىرگە جيىندا ەۆاكۋاسيا كەزىندە قۇجاتتارىن جوعالتىپ العان تۇرعىندارعا قۇجاتتار تەگىن جاسالاتىنى بەلگىلى بولدى.
ءومىرزاق شوكەيەۆ ارىستى «اقىلدى قالاعا» اينالدىرۋ باعىتىنداعى جۇمىستاردى كۇشەيتۋ جانە تۇرعىنداردىڭ ءومىر ساپاسىن جاقسارتۋعا باعىتتالعان باستامالاردى قولعا الۋ جونىندە تاپسىرمالار بەردى.
پىكىر قالدىرۋ