داريعا نازاربايەۆانىڭ ءتوراعالىق ەتۋىمەن پارلامەنت سەناتىنىڭ بيۋرو وتىرىسى ءوتتى دەپ حابارلايدى Qamshy.kz اقپارات اگەنتتىگى.
حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتوراعاسى مۇحتار قۇل-مۇحاممەد سەناتورلاردىڭ ارىس قالاسىنا ساپارىنىڭ قورىتىندىلارى تۋرالى بيۋرو مۇشەلەرىن جان-جاقتى حاباردار ەتتى. سەناتورلار داريعا نازاربايەۆانىڭ تاپسىرماسى بويىنشا ەۆاكۋاسيا پۋنكتتەرىنە بارىپ، ادامداردىڭ ورنالاسۋ جاعدايىمەن، جارىلىس سالدارىن جويۋ جونىندەگى شتابتىڭ جۇمىسىمەن تانىستى، قالانى ارالاپ تۇرعىندارىمەن كەزدەستى. پارلامەنت سەناتىنىڭ 4 شىلدەدە بولاتىن وتىرىسىنىڭ كۇن ءتارتىبى بەلگىلەندى.
بيۋرودا سەناتورلار كەڭەسىن قۇرۋ تۋرالى ماسەلە دە ماقۇلداندى. كەڭەس سەناتتىڭ بۇرىنعى دەپۋتاتتارىن، كورنەكتى مەملەكەت قايراتكەرلەرىن پالاتا جۇمىسىنا تارتۋ، تاجىريبە الماسۋ، پارلامەنتاريزمدى دامىتۋعا باعىتتالعان شارالاردى وتكىزۋ ماقساتىندا قۇرىلعان اقىلداستىق-كەڭەسشى ورگان بولادى.
سەنات باسشىسى دەپۋتاتتاردىڭ الداعى ايماقتارعا ساپارلارىنا بيۋرو مۇشەلەرىنىڭ نازارىن اۋداردى. كەزدەسۋلەر ءبىرسارىندى وتپەگەنى ماڭىزدى ەكەنىن ايتىلدى.
“ەڭبەك ۇجىمدارىن، زاۋىتتاردى، شاحتالاردى ارالاڭىزدار، باتىس ايماقتارداعى مۇنايشىلارمەن كەزدەسىڭىزدەر. ءماسليحات دەپۋتاتتارىمەن كەزدەسۋلەر وتكىزىڭىزدەر، اۋىلدارعا بارىڭىزدار، ءتورتىنشى دەڭگەيدەگى بيۋدجەت، جەرگىلىكتى ءوزىن-وزى باسقارۋ قالاي جۇمىس ىستەيدى؟ اكىمدەرمەن، اۋىل تۇرعىندارىمەن سويلەسىڭىزدەر. بۇرىنعى قالىپتاسقان داعدىنى وزگەرتەيىك، تۇرعىنداردىڭ ۇيلەرىنە كىرىپ، ءدام تاتىپ، فۋنكسيونەر ەمەس، قاراپايىم ادام رەتىندە اڭگىمەلەسىڭىزدەر”، - دەدى نازاربايەۆا.
پىكىر قالدىرۋ