تۇركىستان وبلىسى ارىس قالاسىندا بولعان جارىلىستى قازاقستاننىڭ قورعانىس ءمينيسترى نۇرلان ەرمەكبايەۆ "تابيعي اپات" دەپ ايتىپ، قوعامنىڭ سىنىنا ۇشىرادى. الەۋمەتتىك جەلىدە "اي مەن كۇننىڭ امانىندا وق-دارىلەر اتىلىپ، سناريادتار قالاعا قاراي ۇشقانى قالايشا تابيعي اپات بولماق" دەپ ءمينيستردى سوككەن كوپشىلىكتىڭ قاراسى كوپ. جۋرناليست، اقىن ەسەي جەڭىس ۇلى دا ءمينيستردىڭ ارىسقا قاتىستى ايتقانىنا ارناپ ولەڭ شىعارىپ، ونى ءوزىنىڭ Facebook پاراقشاسىندا جاريالادى.
"جۋرناليست، قىزىقسىڭ،
ايتارىڭ بولدى ما؟
شەنەۋنىك ءبىر سوزبەن قويادى ورنىڭا.
جاي جاتقان وقتۇمسىق وزىنشە جارىلسا،
كەشىرىم سۇرايتىن مينيستر سورلى ما؟!
ارينە، دۇرىس قوي كوڭىلدە الاڭىڭ،
بۇل دەگەن - "مىنەزى" تابيعات-انانىڭ.
نەنىڭ نە ەكەنىن ايىرا الماستاي،
مينيستر اقىماق ەمەس قوي، قاراعىم...
جەر جەتپەي جاتقانداي،
قويماعا جاقىنداپ،
ءۇي سالىپ العان عوي ادامدار توپىرلاپ.
ولاردىڭ ەركىنە قويساڭ بۇل دۇنيەنى،
بومبانىڭ ۇستىندە شاي ءىشىپ وتىرماق.
حالىقتىڭ كىناسى ءۇشىن دە بىلايعى،
مينيستر قالايشا كەشىرىم سۇرايدى؟!
ولاردىڭ ءتاڭىرى كوكتە ەمەس، جەردە عوي،
اۋرە بوپ ىزدەي مە، اسپاننان قۇدايدى؟
بۇل قازاق نەمەنە؟
كەششە مە، ءاي، تەگى؟
بومبادان قورىقسا، ورالىپ قايتەدى؟
شىمكەنتتەن تام ساتىپ السىن دا، وتىرسىن،
"ءۇيىمدى جوندە" دەپ ايتپاسىن، ايتەۋىر...
ەشكىمگە بەرمەيدى ەشكىم دە ءمىنىس ات،
مينيستر جان ەمەس سەندەرمەن مۇڭى شاق.
وقتۇمسىق دەگەنىڭ بۇل بەيبىت زاماندا،
كەي-كەيدە جارىلىپ تۇرعانى دۇرىس-اق.
مينيستر سويلەسە، ءسوزىنىڭ راسى -
ولاردىڭ ەشقاشان بولمايدى كىناسى.
قارا جەر ءبارىن دە كوتەرە بەرەدى،
جىلاساڭ، تەك قانا اللاڭا جىلاشى..."، - دەپ جازدى ەسەي جەڭىس ۇلى.
3 شىلدەدە قورعانىس ءمينيسترى نۇرلان ەرمەكبايەۆ ءۇش ادام قازا تاۋىپ، مىڭنان استام نىساننىڭ بۇلىنۋىنە سەبەپ بولعان ارىستاعى جارىلىستى "تابيعي قۇبىلىس" دەپ اتاپ، حالىقتان "كەشىرىم سۇراۋدىڭ رەتىن كورىپ تۇرعان جوقپىن" دەپ مالىمدەگەن ەدى.
پىكىر قالدىرۋ