قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ قازاقستاندىقتاردى ەلوردا كۇنىمەن قۇتتىقتادى دەپ جازادى Qamshy.kz اقپارات اگەنتتىگى.
"قۇرمەتتى وتانداستار!
ءقادىرلى ەلوردا تۇرعىندارى!
ەلوردامىز – نۇر-سۇلتان قالاسى قازاقستاننىڭ جارقىن جەتىستىكتەرىن ايشىقتايدى.
تۇڭعىش پرەزيدەنتىمىز نۇرسۇلتان ءابىش ۇلى نازاربايەۆتىڭ استانانى كوشىرۋ تۋرالى بىرەگەي شەشىمى حالقىمىز ءۇشىن اسا ماڭىزدى تاريحي وقيعا بولدى.
ەلباسىنىڭ ەرىك-جىگەرى مەن تەڭدەسسىز ەرلىگىنىڭ ارقاسىندا ەۋرازيا كىندىگىندە ءىرى ساياسي، ەكونوميكالىق، مادەني جانە ءبىلىم ورتالىعى پايدا بولدى. بۇل قادام دامۋ، وركەندەۋ جانە جاسامپازدىق جولىندا قازاقستانعا تىڭ سەرپىن بەردى.
نۇر-سۇلتان قالاسى وسىنداي قىسقا مەرزىم ىشىندە ەۋرازيا تورىندەگى عاجايىپ مەكەنگە اينالدى.
ساۋلەتى ايرىقشا عيماراتتار مەن ەلوردامىزدىڭ زاماناۋي كەلبەتىنە الەم جۇرتشىلىعى ءتانتى بولدى.
قالامىزدا جاھاندىق ءمانى زور ساياسي شارالار وتۋدە. تمد، شىۇ، ەاەو، ەقىۇ، يىۇ سامميتتەرى، ەكسپو-2017 كورمەسى، ازيا ويىندارى، استانا بىتىمگەرشىلىك ۇدەرىسى – وسىنىڭ بارلىعى قازاقستاننىڭ باس قالاسىنىڭ ابىرويىن ارتتىردى.
ەلوردانىڭ وركەندەۋى – ەلباسىنىڭ جانە بارشا قازاقستان حالقىنىڭ ەڭبەگى. ەلىمىزدىڭ بارلىق ءوڭىرى نۇر-سۇلتان قالاسىنىڭ وركەندەۋىنە ۇلەس قوستى. بۇگىندە باس قالامىز بارشا جۇرتىمىزدىڭ ىنتىماق-بىرلىگىنىڭ سيمۆولىنا اينالدى.
ەلوردا – ەلىمىزدىڭ جۇرەگى. مەملەكەتىمىزدىڭ جارقىن بولاشاعىنا جول اشاتىن تاعدىرلى شەشىمدەر وسى جەردە قابىلدانادى.
قازاقستان رەسپۋبليكاسىنىڭ پرەزيدەنتى رەتىندە قالامىزدىڭ بوي كوتەرۋىنە جانە قالىپتاسۋىنا ۇلەس قوسقان ەلىمىزدىڭ ءاربىر ازاماتىنا ريزاشىلىق بىلدىرەمىن.
بارشاڭىزدى ەلوردا كۇنىمەن قۇتتىقتايمىن!
نۇر-سۇلتان قالاسىنىڭ تۇرعىندارىنا جانە بارشا حالقىمىزعا باق-بەرەكە، زور دەنساۋلىق، اماندىق تىلەيمىن!"،- دەلىنگەن قۇتتىقتاۋدا.
پىكىر قالدىرۋ