قازاقستاننىڭ تۇڭعىش پرەزيدەنتىنە شەت ەلدەر كوشباسشىلارىنان قۇتتىقتاۋ حاتتارى كەلىپ تۇسۋدە دەپ جازادى Qamshy.kz اقپارات اگەنتتىگى ەلباسىنىڭ رەسمي سايتىنا سىلتەمە جاساپ.
رەسەي فەدەراسياسىنىڭ پرەزيدەنتى ۆلاديمير پۋتين نۇرسۇلتان نازاربايەۆتى تۋعان كۇنىمەن قۇتتىقتادى.
«ءسىزدىڭ مول تاجىريبەڭىز، ساياسي دانالىعىڭىز جانە تەرەڭ ءبىلىمىڭىز ەۋرازيالىق كەڭىستىكتەگى ينتەگراسيالىق ۇدەرىستەر بويىنشا ستراتەگيالىق سەرىكتەستىك پەن وداقتاستىق قارىم-قاتىناستاردى دامىتۋ ىسىندە ءاردايىم قاجەت بولاتىنىنا سەنىمدىمىن»، – دەدى ۆ.پۋتين.
وزبەكستان رەسپۋبليكاسىنىڭ پرەزيدەنتى شاۆكات ميرزيەوۆ وزبەك حالقىنىڭ ەلباسىنى ءوزىن ەلى مەن حالقىنا جان-تانىمەن قىزمەت ەتۋگە ارناعان كورنەكتى مەملەكەت قايراتكەرى جانە الەمدىك دەڭگەيدەگى پاراساتتى ساياساتكەر رەتىندە تەرەڭ قۇرمەتتەيتىنىن اتاپ ءوتتى.
«تاريحتىڭ ەڭ قيىن ءارى كۇردەلى كەزەڭىندە ءسىزدىڭ مەملەكەت كەلەشەگىنە جاۋاپكەرشىلىك العانىڭىز قازاقستان ءۇشىن تاعدىرشەشتى وقيعا بولدى. ءسىز – بىرەگەي ادامي قاسيەتكە يە، تەرەڭ ءبىلىمدى، باعا جەتپەس كاسىبي جانە ومىرلىك تاجىريبەسى بار تۋا بىتكەن كوشباسشىسىز.
ءسىزدىڭ قازاقستان رەسپۋبليكاسىنىڭ تۇڭعىش پرەزيدەنتى – ەلباسى رەتىندە قازاقستان مەملەكەتىن، ەلىڭىزدىڭ ەگەمەندىگى مەن تاۋەلسىزدىگىن قالىپتاستۋرى جانە نىعايتۋداعى تاريحي ميسسياڭىزعا بەرىلگەن شىنايى جوعارى باعانى تولىق قولدايمىن»، – دەلىنگەن جەدەلحاتتا.
بەلارۋس رەسپۋبليكاسىنىڭ پرەزيدەنتى الەكساندر لۋكاشەنكونىڭ جەدەلحاتىندا تۇڭعىش پرەزيدەنتتىڭ ساياسي باعدارىنىڭ ارقاسىندا قازاقستان رەسپۋبليكاسى تابىستى، قۋاتتى جانە تاۋەلسىز مەملەكەتكە اينالعانى ايتىلعان.
«ءسىزدىڭ بەلورۋس-قازاقستان ىنتىماقتاستىعىن دامىتۋ ماسەلەلەرىنە كوڭىل ءبولىپ، حالىقتارىمىزدىڭ اراسىنداعى كوپجىلدىق دوستىق ءداستۇردى، ءوزارا قۇرمەت پەن باۋىرلاستىق قارىم-قاتىناستاردى نىعايتۋعا قوسقان جەكە ۇلەسىڭىز ءۇشىن شىنايى ريزاشىلىقتامىن. ۇلتتىڭ شىن مانىندەگى كوشباسشىسى، ءوز حالقىنا ادالدىقتىڭ ۇلگىسى بولا وتىرىپ، ءسىز مەملەكەتتىڭ دامۋى مەن وركەندەۋى ءۇشىن تالماي ەڭبەكتەنىپ كەلەسىز»، – دەلىنگەن جەدەلحاتتا.
تۇرىكمەنستان پرەزيدەنتى گۋربانگۋلى بەردىمۇحامەدوۆ ءوزىنىڭ قۇتتىقتاۋىندا قازاقستان ءومىرىنىڭ بارلىق سالاسىندا اۋقىمدى وزگەرىستەر مەن ەلدىڭ ايتارلىقتاي جەتىستىكتەرى تۇڭعىش پرەزيدەنت – ەلباسى اتىمەن تىعىز بايلانىستى ەكەنىن اتاپ ءوتتى.
«ءبىز تۇرىكمەنستاندا ءسىزدىڭ ەلدەرىمىزدىڭ اراسىنداعى قارىم-قاتىناستاردى دامىتۋعا قوسقان جەكە ۇلەستەرىڭىزدى جوعارى باعالايمىز جانە كوپ جىلعى تاتۋ كورشىلىك، سەنىم مەن قۇرمەتكە نەگىزدەلگەن ەكى جاقتى ستراتەگيالىق ىنتىماقتاستىقتى ودان ءارى نىعايتۋعا نيەتتىمىز.
وسى اتاۋلى كۇنى شىن جۇرەكتەن سىزگە زور دەنساۋلىق، ۇزاق ءومىر، سارقىلماس كۇش-قۋات، مول باقىت، ال باۋىرلاس قازاقستان حالقىنا بەيبىت ءومىر تىلەپ، ودان ءارى وسىپ-وركەندەي بەرۋىنە تىلەكتەستىك بىلدىرەمىن»، – دەلىنگەن جەدەلحاتتا.
سەربيا پرەزيدەنتى الەكساندر ۆۋچيچ قازاقستاننىڭ تۇڭعىش پرەزيدەنتىنىڭ كورەگەن ساياساتىنىڭ ارقاسىندا قازاقستاننىڭ قول جەتكىزگەن جەتىستىكتەرىنە توقتالدى.
«وسى مۇمكىندىكتى پايدالانىپ، سەربيا مەن قازاقستاننىڭ تىعىز ىنتىماقتاستىققا قول جەتكىزۋى جولىنداعى جان-جاقتى نيەتتەستىك ءۇشىن تاعى دا العىس بىلدىرگىم كەلەدى. ەلدەرىمىزدىڭ قارىم-قاتىناستارىن ودان ءارى نىعايتۋعا كوپ مۇمكىندىكتىڭ بار ەكەنىنە سەنىمىم مول »، – دەلىنگەن حاتتا.
پىكىر قالدىرۋ