ەلىمىزدەگى از قامتىلعان وتباسىلاردىڭ قارىزىن تولىقتاي جابۋ ناۋقانى اعىمداعى جىلدىڭ 1-قىركۇيەگىنە دەيىن وتەلمەك. بۇل تۋرالى ۇكىمەتتىڭ كەڭەيتىلگەن وتىرىسىندا ۇلتتىق بانك ءتوراعاسى ەربولات دوسايەۆ ايتتى دەپ جازادى Qamshy.kz اقپارات اگەنتتىگى.
ۇكىمەت وتىرىسى بارىسىندا قاسىم-جومارت توقايەۆ قارىز وتەۋگە قاۋقارسىز ادامداردىڭ نەسيەسىن تولەۋ تۋرالى بۇيرىعىنىڭ جۇزەگە اسۋ بارىسى تۋرالى سۇرادى.
ۇلتتىق بانك ءتوراعاسىنىڭ ايتۋىنشا، بۇل بۇيرىقتى جۇزەگە اسىرۋ ءۇشىن مەملەكەتتىك قارجى مەكەمەسى ەكى بلوككا ءبولىنىپ جۇمىس جاساۋدا.
"ق ر ەڭبەك جانە حالىقتى الەۋمەتتىك قورعاۋ مينيسترلىگىمەن جۇرگىزىلىپ جاتقان ادامداردىڭ نەسيەسى تۋرالى اقپارات پەن ولاردىڭ ءال-احۋالى تۋرالى مالىمەت الۋ جۇمىستارىن وسى اپتادا اياقتايمىز. ال كەلەسى اپتادان باستاپ ءبىز ەكىنشى دەڭگەيلى بانكتەر مەن كىشى قارجى ۇيىمدارىمەن، پروبلەمالى نەسيەلەر قورىمەن كەلىسسوزدەر جۇرگىزە باستايمىز. اعىمداعى جىلدىڭ 1-قىركۇيەگىنە دەيىن بانك تاراپىنان بۇل جۇمىستار اياقتالادى دەپ ويلايمىز"، - دەدى دوسايەۆ.
قاسىم-جومارت توقايەۆ ءوز كەزەگىندە بۇل جۇمىستى ۇكىمەت پەن پرەزيدەنت اكىمشىلىگى تاراپىنان قاتاڭ قاداعالاپ وتىرۋدى تاپسىردى.
"ءبىز بۇل اكسيانى ءبىر رەت جاريالادىق. ءارى قاراي بۇل جۇمىسپەن اينالىسپايمىز، اينالىسۋعا قۇقىعىمىز دا جوق. ءبىراق حالىققا جاريا ەتىلگەن دۇنيە ءوز ۋاقىتىندا، ساپالى ورىندالۋى ءتيىس"، - دەدى توقايەۆ.
ەسكە سالا كەتەيىك، قازاقستان رەسپۋبليكاسىنىڭ پرەزيدەنتى ازاماتتاردىڭ احۋالىن جاقسارتۋ ءۇشىن نەسيەلەردى جانە پايىزدىق ۇستەمەلەردى تولەۋ تۋرالى بۇيرىق شىعارعان.
پىكىر قالدىرۋ