بۇگىن قازاق تىلىنە اۋدارىلعان تاعى ءبىر شەتەلدىك فيلم كورەرمەنگە جول تارتتى. «بولاشاق» كورپوراتيۆتىك قورىنىڭ «وزىڭنەن باستا» جوباسى اياسىندا 31ء-فيلمدى – Disneyء-دىڭ ءتول ءونىمى «كورول ليەۆ»/«ارىستان پاتشا» ءفيلمىن قازاقشا «سويلەدى» دەپ حابارلايدى Qamshy.kz اقپارات اگەنتتىگى.
ءفيلمنىڭ دۋبلياجىن دايىنداۋعا BI Group كومپانياسى دەمەۋشىلىك جاسادى.
قاراپ وتىرساق، قازاقستان نارىعىنا جىل سايىن 300-گە جۋىق شەتەلدىك فيلم كىرەدى ەكەن. الايدا سونىڭ ءبارى قازاق تىلىنە اۋدارىلمايدى. نەگە؟ مۇنىڭ سەبەبىن ىلگەرىدە مادەنيەت جانە سپورت مينيسترلىگى تۇرلىشە تاسىلمەن بىلدىرگەن بولاتىن. سونداعى ايتاتىنى – قازاق تىلىنە ساۋاتتى اۋدارما جاساۋعا كەتەتىن شىعىن كولەمى كوپ دەگەنگە سايادى. دۋبلياجعا جۇمسالعان قارجى ءفيلمنىڭ قازاقستانداعى كورسەتىلىمىنەن تۇسكەن پايدادان اسىپ تۇسەتىن كورىنەدى. وسىنداي جاعدايلاردىڭ ءبارى دە اينالىپ كەلگەندە ءوزىمىزدىڭ قازاق ءتىلىنىڭ تىنىسىن تارىلتىپ، ودان سايىن تەجەپ جاتقانى جاسىرىن ەمەس.
مينيسترلىك وسىنداي تۇسىنىكتەمە بەرىپ، مەملەكەتتىك ورگاندار ءتىل ماسەلەسىندە سەلسوقتىق تانىتسا دا، ەل ازاماتتارى مەن وتاندىق بيزنەس وكىلدەرى قاراپ قالماي، قازاق ءتىلىن دامىتۋعا، ءقازاقتىلدى ساپالى كونتەنت قالىپتاستىرۋعا تاۋداي ۇلەس قوسىپ كەلەدى. سونىڭ ارقاسىندا قازاقشا «سويلەگەن» فيلمدەر قاتارى كوبەيىپ، ءوز كورەرمەنىمەن قاۋىشۋدا. مينيسترلىك جولعا قويا الماعان دۇنيەنى، ازاماتتار وسىلاي ابىرايمەن اتقارىپ وتىر. ىستەۋگە بولا ما، ارينە بولادى!
قازاق تىلىنە جاسالعان قامقورلىق مۇنىمەن توقتاپ قالمايدى. «بولاشاق» كورپوراتيۆتىك قورى مەن BI Group ءوزارا مەموراندۋمعا قول قويىپ، 2020 جىلى Walt Disney Pictures، Pixar، Sony Pictures سەكىلدى الدىڭعى قاتارلى كومپانيالاردىڭ 7 ءفيلمىن قازاقشاعا اۋدارۋدى جوسپارلاپ وتىر ەكەن. بۇل جايلى «بولاشاق» كورپوراتيۆتىك قورى قامقورشىلىق كەڭەسىنىڭ ءتورايىمى دينارا ءشايجۇنىسوۆا «ارىستان پاتشا» ءفيلمىنىڭ تۇساۋكەسەرى كەزىندە حابارلادى. ونىڭ ايتۋىنشا، «وزىڭنەن باستا» جوباسى ەشقانداي دا مەملەكەتتىك قولداۋ كورمەدى، كەرىسىنشە قازاقستاندىق كومپانيالار مەن مەسەناتتاردىڭ دەمەۋشىلىگى ارقاسىندا جۇزەگە اسىپ وتىر.
– «بولاشاق» كورپوراتيۆتىك قورىنا كينوتەاترلارداعى قازاق تىلىندەگى فيلمدەردىڭ كورسەتىلۋ ۋاقىتىنا قاتىستى كوپ سىن-تالاپتار ايتىلادى. وسىعان بايلانىستى بيىل قور كينوتەاترلار مەن اۋديتوريالاردا ءقازاقتىلدى كونتەنتتىڭ تەڭ قولجەتىمدىلىگىنە جانە باسقا دا ماسەلەلەرگە قاتىستى «كينو تۋرالى» زاڭ جوباسىنا ءوز ۇسىنىستارىن ەنگىزدى. مەنىڭشە، مۇنداي باعىتتاعى جۇمىستارمەن مادەنيەت جانە سپورت مينيسترلىگى اينالىسىپ، قولداپ، قۋاتتاۋى كەرەك ەدى. سەبەبى مينيسترلىك – قازاق ءتىلى مەن مادەنيەتىنىڭ دامۋىنا تىكەلەي اتسالىساتىن ۇيىم»،– دەدى «بولاشاق» كورپوراتيۆتىك قورى قامقورشىلىق كەڭەسىنىڭ ءتورايىمى دينارا ءشايجۇنىسوۆا.
مادەنيەت جانە سپورت مينيسترلىگى بۇدان ىلگەرىدە «كينەماتوگرافيا تۋرالى» زاڭعا سايكەس شەتەلدىك فيلمدەردى تيتر ارقىلى اۋدارما جاساپ كورسەتۋدى جولعا قويعان ەدى. الايدا بۇل بىردەن قوعامنىڭ سىنىنا ۇشىراپ، قازاق ءتىلىن قولداۋ ەمەس، قورلاۋعا جول اشىپ بەردى. ناقتى ايتساق، تيترداعى قازاقشا اۋدارمالارداعى گرامماتيكالىق قاتەنىڭ ءورىپ ءجۇرۋى، ماعىناسىنىڭ بۇرمالانۋى، كورەرمەندەردىڭ اشۋ-ىزاسىن تۋدىرىپ، شاعىمدانۋعا ءماجبۇر ەتتى. وسىنداي شاعىمدار ناتيجەسىندە «مۋمباي وتەلى: تايتالاس» ءفيلمىنىڭ پروكاتقا بەرىلگەن كۋالىگىن الىپ قويعان بولاتىن.
ال «بولاشاق» كورپوراتيۆتىك قورى مۇنداي ماسەلەردىڭ شەشىمىن باياعىدا-اق تاپقان. قوردىڭ «وزىڭنەن باستا» جوباسى گولليۆۋد فيلمدەرىنىڭ قازاق تىلىنە دۋبلياجدالۋىن 2011 جىلدان باستاپ اتقارىپ كەلەدى. بۇل الەۋمەتتىك جوبا ەشقانداي كوممەرسيالىق ماقساتتى كوزدەمەيدى. جىل سوڭىنا دەيىن «بولاشاق» قورى قازاندا «مالەفيسەنتا»، قاراشادا «حولودنوە سەردسە 2»/«مۇزدى ولكە 2» فيلمدەرىن قازاقشا سويلەتپەك.
ال وسى ۋاقىتقا دەيىن «وزىڭنەن باستا» جوباسى اياسىندا قازاق تىلىنە 31 گولليۆۋد كينوكارتيناسى اۋدارىلدى. ولار – «تاچكي-2»/«كولىكتەر 2»، «مستيتەلي-2: ەرا الترونا»/«كەك الۋشىلار: الترون ءداۋىرى»، «حرابرايا سەردسەم»/«باتىل جۇرەك»، «تاينا كوكو»/«كوكو قۇپياسى»، «موانا»، «مالەفيسەنتا»، «الاددين»، «يستوريا يگرۋشەك-4»/ «ويىنشىقتار حيكاياسى-4» تاعى باسقالار.
Walt Disney Pictures كومپانياسىنىڭ داۋىستار بازاسىندا وتاندىق 100 اكتەر تىركەۋدە تۇر. سولاردىڭ ارقاسىندا قازاق ءتىلى تۇركى تىلدەس حالىقتار تىلدەرى ىشىندە تۇرىك تىلىنەن كەيىنگى ەكىنشى ورىنعا كوتەرىلدى.
مىنە، قازاق تىلىنە دەگەن جاناشىرلىق وسىنداي بولسا كەرەك! مينيسترلىك وسىدان كەيىن ويلانسا بولار...
پىكىر قالدىرۋ