30 شىلدە كۇنى قاجىلىققا نيەتتەنگەن 3200 ازامات نۇر-سۇلتان، الماتى، شىمكەنت جانە اقتاۋ قالالارىنان ساۋد ارابياسىنا ساپار شەگەدى، دەپ حابارلايدى Qamshy.kz اقپارات اگەنتتىگى.

"بيىلعى قاجىلىق ماۋسىمى وسى ايدىڭ 30-ىنان باستالادى. بيىلعى قاجىلىققا بارۋ بويىنشا ساۋد ارابياسى تاراپىنان ءبىزدىڭ 3200 ازاماتىمىزعا كۆوتا بەرىلدى. وسىعان سايكەس قازاقستان مۇسىلماندار ءدىني باسقارماسى قازاقستاندىقتاردى قاجىلىققا دايىنداپ جاتىر"، - دەدى اقپارات جانە قوعامدىق دامۋ مينيسترلىگى ءدىن ىستەرى كوميتەتىنىڭ ءتوراعاسى ەرجان نۇكەجانوۆ.

سونداي-اق، ءدىن ىستەرى كوميتەتىنىڭ ءتوراعاسى ارنايى قاجىلىق ميسسيا قۇرىلعانىن ايتىپ ءوتتى.

"ارنايى قاجىلىق ميسسياعا ءبىزدىڭ كوميتەتتىڭ وكىلى، سونىمەن قاتار، دەنساۋلىق ساقتاۋ مينيسترلىگىنىڭ وكىلدەرى ەنگىزىلدى. ويتكەنى قاجىلىق ساپار كەزىندە ۇيىمداستىرۋشىلىق نەمەسە دەنساۋلىق تاراپىنان ءبىر ماسەلەلەر تۋىنداپ جاتسا، سول كىسىلەر قازاقستان مۇسىلماندار ءدىني باسقارماسىمەن بىرگە وسى ماسەلەلەردى شەشەتىن بولادى"، - دەدى ەرجان نۇكەجانوۆ.

سونىمەن قاتار، قاجىلىققا بارۋ ءۇشىن مىندەتتى تۇردە ساۋد ارابياسى تاراپىنان بەكىتىلگەن ەكپەدەن ءوتۋ قاجەت.

"مىندەتتەلگەن ەكپە ەلىمىزدىڭ ءبىراز قالالارىندا وتكىزىلەدى. قازىرگى كەزدە بۇل پروسەسس جالعاسىپ جاتىر"،- دەدى نۇكەجانوۆ.

قازاقستان مۇسىلماندارى ءدىني باسقارماسى ءتوراعاسىنىڭ ءبىرىنشى ورىنباسارى نايب ءمۇفتي ناۋرىزباي ۋتپەنوۆ قارىزعا قاجىلىققا باراتىندارعا قاتىستى پىكىر ءبىلدىردى.

«قارىز الىپ، كومەك سۇراپ قاجىلىققا باراتىندار دا كەزدەسەدى. ونى شاريعات قولدامايدى»، - دەدى نايب ءمۇفتي.