اسكەريلەر ارىس قالاسىنىڭ ۇستىندە ۇشىپ جۇرگەن قۇرىلعىنى قولعا ءتۇسىردى. مۇنداي دۇنيەلەردى اسكەري ايماقتاردا ۇشىرۋعا تىيىم سالىنعان دەپ جازادى Qamshy.kz اقپارات اگەنتتىگى قورعانىس مينيسترلىگىنىڭ سايتىنا سىلتەمە جاساپ.
"2019 جىلدىڭ 21-شىلدەسى كۇنى ساعات 10:25 شاماسىندا تۇركىستان وبلىسى، ارىس قالاسىنىڭ ۇستىندە ۇشىپ جۇرگەن قۇرىلعىنى اسكەريلەر انتيدرون تەحنولوگياسى ارقىلى قولعا تۇسىرگەن. اسكەري ايماقتاردا دروندار ارقىلى فوتولار تۇسىرۋگە تىيىم سالىنعان. قولعا تۇسكەن درون ءبىرشاما ۋاقىتتان كەيىن يەسىنە قايتارىلدى"، - دەپ مالىمدەدى ۆەدومستۆا.
رۇقسات ەتىلمەگەن قۇرىلعىنىڭ ارىس قالاسى ۇستىندە ۇشىپ جۇرگەنىن الدىمەن اسكەري پوليسيا بايقاپ، شارا قولدانعان. ءىستى ءارى قاراي جالعاستىرۋ ازاماتتىق اۆياسيا كوميتەتىنە تاپسىرىلدى.
قورعانىس مينيسترلىگىنىڭ مالىمەتىنشە، درونداردى رۇقسات ەتىلمەگەن جەرلەردە پايدالانعان ازاماتتار اكىمشىلىك جاۋاپكەرشىلىككە تارتىلادى. 10-20 اەك كولەمىندە ايىپپۇل ارقالاۋى مۇمكىن.
"وسى رەتتە قورعانىس مينيسترلىگى اسكەري ايماقتاردا درونداردى ۇشىرۋعا جانە سۋرەتكە تۇسىرۋگە تىيىم سالىنعانىن ەسكەرتەدى. اسكەريلەردىڭ دروندى ۇستاپ الۋعا نەمەسە جويىپ جىبەرۋگە قۇقىعى بار"، - دەلىنگەن حابارلامادا.
پىكىر قالدىرۋ