قۇرىلىپ جاتقان ۇلتتىق قوعامدىق سەنىم كەڭەسىنىڭ جۇمىسى باياندى بولۋى ءۇشىن، ەڭ الدىمەن، قوعام مەن بيلىك اراسىنداعى جىلدار بويىنا قوردالانىپ، سىرەسىپ، ەلدىڭ ەڭسەسىن باسىپ، سانا مەن جۇرەكتى، قوعامدىق ءومىردىڭ بارلىق سالاسىن بيلىپ-توستەپ العان سەنىمسىزدىكتەن ارىلۋ كەرەك!
1995 جىلدان بەرى ورنىعىپ، شاڭىراق پەن جاڭاوزەن تراگەديالارى تۇسىندا شارىقتاۋ شەگىنە جەتكەن ول سەنىمسىزدىكتەن قۇتىلۋ وڭاي ەمەس. ول ءۇشىن پرەزيدەنتتىڭ ءبىر جارلىعى جەتكىلىكسىز.
ەكىنشى جاعىنان، ەكى سۋبەكت اراسىنداعى سەنءىم - ەكىجاقتى پروسەسس بولۋى كەرەك. جانە دە ەكى تاراپ وسى باستاماعا شىن نيەتىمەن كىرىسۋى كەرەك سياقتى. بيلىك ءوز ىقتيارىن تانىتتى. ەندى قوعام دا العا ءبىر قادام جاساپ، وسى مۇمكىندىكتى پايدالانىپ كورگەنىنەن ەش ابەستىك نە ساياسي قاتە كورىپ وتىرعان جوقپىن.
كوش ءجۇر تۇزەلە مە، جوق پا، كورەيىك. كەڭەس سەنىمىمىزدى اقتاماسا، ونى دا ايتا جاتارمىز.
ەڭ باستىسى، ءبىزدىڭ جاعدايدا "سەنىم" دەگەن تەرمين ساياسي-بيۋروكراتيالىق سيپاتتان گورى مورالدىق، پسيحولوگيالىق، گۋمانيستىك ماعىناعا يە بولىپ تۇر.
كەڭەس ءدال سونداي ادامي بيىكتىككە قول جەتكىزە الا ما؟ ماسەلە سوندا!
سول سەنىمدى قايتا قالپىنا كەلتىرۋدىڭ العاشقى قادامى - ساياسي تۇتقىنداردى - ارون اتابەكتى، مۇقتار جاكىشيەۆتى، ماكس بوقايەۆتى بوستاندىققا شىعارۋ بولسا، ءسوزسىز، وسى كەڭەسكە دەگەن ەلدىڭ كوزقاراسى وڭالا تۇسەر ەدى!
PS. ءبىر ۇسىنىس. وسى تۇرپاتتى كەڭەستەر ايماقتاردا دا بولۋى كەرەك دەپ ويلايمىن: سەنىمسىزدىكتىڭ كوكەسى سول جاقتا ەمەس پە؟!
ءامىرجان قوسانوۆتىڭ فەيسبۋك پاراقشاسىنان الىنعان
پىكىر قالدىرۋ