اتىراۋ وبلىسىنىڭ اكىمى نۇرلان نوعايەۆ «اتىراۋ» الەۋمەتتىك-كاسىپكەرلىك كورپوراسياسىنىڭ ديرەكتورلار كەڭەسىنىڭ وتىرىسىنا قاتىستى. بۇل تۇرالى اتىراۋ وبلىسىنىڭ وڭىرلىك كوممۋنيكاسيالار قىزمەتى حابارلايدى دەپ جازادى Qamshy.kz اقپارات اگەنتتىگى.

ديرەكتورلار كەڭەسىندە 2018 جىلى جانە 2019 جىلدىڭ العاشقى جارتى جىلدىعىندا جاسالعان جۇمىستار مەن الداعى اتقارىلاتىن جوسپارلار تۋرالى ايتىلدى.

«اتىراۋ» اكك ءتوراعاسى مارات تۇسىپقالييەۆتىڭ ايتۋىنشا وتكەن جىلى «اتىراۋ» الەۋمەتتىك-كاسىپكەرلىك كورپوراسياسىنىڭ قولداۋىمەن ءبىرقاتار جوبالار جۇزەگە اسىرىلدى. ونىڭ ىشىندە اتىراۋ قالاسىنا جاڭا قوعامدىق كولىكتەر الىندى. سونىمەن قاتار، نۇرسايا ىقشام اۋدانىنداعى مەديسينا قىزمەتكەرلەرىنە ارنالعان كوپ قاباتتى تۇرعىن ءۇيدىڭ قۇرىلىس جۇمىستارى اياقتالعان. سونداي-اق، تۇراقتاندىرۋ قورىنىڭ جۇمىسىدا جۇيەلەنگەن.

كەزدەسۋ بارىسىندا ەندى جاسالاتىن ينۆەستيسيالىق جوبالار تۋرالى دا ءسوز قوزعالدى. ونىڭ ىشىندە كۇنى بۇگىندە «100 ساۋدا ورنى» باعدارلاماسى بويىنشا وڭىردە جۇمىستار جۇرگىزىلىپ، كاسىپكەرلەرگە تىڭ سەرپىن بەرىلۋدە. وسى جوبا بويىنشا ايماقتا ساۋدا جاسايتىن دۇڭگىرشىكتەر اشىلاتىن بولادى.

جيىن بارىسىندا وبلىس اكىمى نۇرلان نوعايەۆقا ينۆەستورلاردىڭ قارجىسىنا سالىناتىن عيماراتتار، ساۋدا ورتالىقتار مەن تۇرعىن ۇيلەردىڭ جوبالارى ۇسىنىلدى.

- قازىرگى تاڭدا ءبىرتالاي جۇمىستار جاسالىپ جاتىر. دەگەنمەن ينۆەستورلارعا نەسيە رەتىندە بەرىلگەن قاراجات ۋاقىتى كەلگەن كەزدە، قايتارىلۋى ءتيىس. ۇكىمەت قايتارىمسىز قاراجات بولە المايدى. سوندىقتان جوبالارىڭىزدى الىپ كەلىڭىزدەر، ۇسىنىڭىزدار. ەگەردە ەلدىڭ دامۋىنا، تۇرعىنداردىڭ قاجەتتىلىگىنە جارايتىن بولسا، بىزدەر ءارقاشان قولداۋعا دايىنبىز،- دەيدى ايماق باسشىسى نۇرلان نوعايەۆ.