پوەزيا پاديشاسىن ەسكە الۋعا ارنالعان جىر دوداسىن وبلىستىق مادەنيەت، ارحيۆتەر جانە قۇجاتتاما باسقارماسى مەن «رۋحانيات» جاستار ۇيىمى قوعامدىق بىرلەستىگى ۇيىمداستىردى. جيىنعا ولەڭسۇيەر كورەرمەننەن وزگە، ءوڭىر زيالىلارى، اقىننىڭ ۇلى الماس وڭعارسىنوۆ باستاعان اۋلەتى قاتىستى. شارا شىمىلدىعى م.وتەمىس ۇلى اتىنداعى اكادەميالىق قازاق دراما تەاترىنىڭ ارتىستەرىنىڭ «ولەڭ، مەن سەنى ايالاپ وتەم» پوەتيكالىق كومپوزيسياسىمەن اشىلدى. ودان ءارى وبلىس اكىمى نۇرلان نوعايەۆ قۇتتىقتاۋ ءسوز سويلەدى.

– فاريزا اقىن ءوزىنىڭ ءور مىنەزدىلىگىمەن، وتكىرلىگىمەن، باتىلدىعىمەن ەرەكشەلەنەدى. ونىڭ بۇل مىنەزىنىڭ ءار جاعىندا ەلگە دەگەن قامقورلىق، قولداۋ جاتاتىن. ول تۋابىتكەن وسىناۋ قاسيەتىمەن ادەبيەتتى العا سۇيرەدى. جىر جاۋھارى اتاندى. پوەزيادا شىعارماشىل بۋىنداردى قالىپتاستىردى. ەندىگى ۋاقىتتا ءبىز پوەزيا پاديشاسىنىڭ شىعارماشىلىعىن ناسيحاتتاي ءتۇسۋىمىز قاجەت. ونىڭ ارتىنان ىلەسكەن ۇلى كوش جالعاسا بەرۋى ءتيىس. بۇل رەتتە وسىنداي ءمۇشايرالاردى، ەسكە الۋ كەشتەرىن وتكىزۋدىڭ ماڭىزى زور، – دەدى نۇرلان اسقار ۇلى.

ۇيىمداستىرۋشىلاردىڭ ايتۋىنشا، فاريزا اقىنعا ارنالعان جىر ءمۇشايراسى جاريالانعاننان بەرى وعان قاتىسۋعا 100-گە تارتا اقىن نيەت بىلدىرگەن. بەلگىلەنگەن شارت بويىنشا، اقىندار فاريزا اقىننىڭ ولەڭدەگى، ومىردەگى قايتالانباس بولمىسىن جىرعا قوسۋى كەرەك. بايقاۋعا كەلىپ تۇسكەن جۇزگە تارتا ولەڭدەردىڭ ىشىنەن سەگىز اقىننىڭ جىرى سۇرىپتالىپ الىندى. ولار شاراعا مەيمان رەتىندە قاتىسىپ، 
اقىنعا ارناپ جازعان ولەڭدەرىن دە وقىدى.

بايقاۋ جابىق تۇردە وتكەندىكتەن، اقىندار جىر بايگەسىنە لاقاپ اتپەن قاتىستى. جىر بايقاۋىنا قازاقتىڭ كورنەكتى اقىنى، رەسپۋبليكالىق ماحامبەت سىيلىعىنىڭ لاۋرەاتى، «قۇرمەت» وردەنىنىڭ يەگەرى سۆەتقالي نۇرجان ءتوراعالىق ەتتى.

جيىن بارىسىندا قازىلار القاسىنىڭ ساراپتاما ناتيجەسى ايتىلىپ، اتىراۋ تورىنە جينالعان جەڭىمپاز اقىندار سالتاناتتى جاعدايدا ماراپاتتالدى.

«دارىن» دەگەن اتپەن قاتىسقان الماتىلىق اقىن دينارا مالىك، «قوڭدىگەر» دەگەن اتى بار الماتىلىق ءتوقتارالى تاڭجارىق جانە «تامشى» اتتى باتىسقازاقستاندىق جانەركە عينايات ءۇشىنشى ورىنمەن ماراپاتتالدى. ال، «بايرون» دەگەن اتپەن قاتىسقان الماتىلىق باتىرحان سارسەنحان مەن «ارسلان» دەگەن لاقاپ ەسىمى بار اتىراۋلىق اقىن اسىلانبەك شىعىروۆ ەكىنشى ورىنعا يە بولدى. ءبىرىنشى ورىندى «شالقار» لاقاپ اتىمەن «دارىن» مەملەكەتتىك جاستار سىيلىعىنىڭ لاۋرەاتى قالقامان سارين جەڭىپ الدى.

ال، باس جۇلدە «تورە» لاقاپ اتىمەن قاتىسۋشى قاراعاندىلىق ميراس اسانعا بۇيىردى. سونداي-اق، رەسپۋبليكالىق جىر ءمۇشايراسىنىڭ ف.وڭعارسىنوۆا اتىنداعى ارنايى جۇلدەسى دە تابىس ەتىلدى. بۇل ماراپاتتى فاريزا اقىننىڭ سۇيىكتى نەمەرەسى الان وڭعارسىنوۆ تارازدىق اقىن ارايلى جاقسىلىققا ۇسىندى.