وزبەكستاندا قاشقاداريا وبلىسى ياككاباك اۋدانىندا كاسىپكەر ءوزىنىڭ جاڭادان سالىنعان ەكى قاباتتى ءۇيىن، دۇكەنىن جانە سەحىن ءسۇرىپ تاستاماق بولعان اكىم ورىنباسارىنىڭ ۇستىنە جانارماي شاشىپ، ورتەپ جىبەردى دەپ حابارلايدى Qamshy.kz اقپارات اگەنتتىگى CA-NEWS (UZ) سايتىنا سىلتەمە جاساپ.
وقيعا 20-شىلدە كۇنى جۇزدەگەن كۋاگەردىڭ كوز الدىندا بولعان.
قۇرىلىسقا جاۋاپ بەرەتىن اكىم ورىنباسارى مانسۋر تۋيمايەۆ ءۇيدى ءسۇرىپ تاستاۋدان باس تارتقان تەحنيكا جۇرگىزۋشىسىنىڭ جانىنا جيىرما شاقتى ادام الىپ كەلىپ، وعان دەرەۋ عيماراتتاردى قيراتۋدى تاپسىرعان.
جاردەماقى بەرىلمەگەندىكتەن، دۇكەندى بۇزباي قويا تۇرۋىن سۇراعان كاسىپكەردىڭ ءسوزىن قۇلاققا ىلمەگەن اكىم ورىنباسارى تۋيمايەۆتىڭ ۇستىنە جانارماي شاشىپ ورتەپ جىبەرگەن. شەنەۋنىكتىڭ ۇستىندە جانىپ جاتقان لاپىلداعان وتتى جانىنداعى ادامدار ءسوندىرىپ، ونى جەدەل تۇردە اۋرۋحاناعا الىپ بارعان.
ءوزىنىڭ قارسىلىعىن وسىلاي كورسەتكەن كاسىپكەردى ءىىم الىپ كەتكەن، ال ايەل، بالا-شاعاسى پوليسيا بولىمشەسىنە جەتكىزىلدى.
"دۇكەن قوجايىنىڭ مويىنىندا كوپتەگەن نەسيەسى بار ەكەنىن، قولىنا ۇكىمەت بەرەتىن اقشانى المايىنشا عيماراتتى بۇزۋعا رۇقسات بەرمەيتىنىن ايتتى. بۇل تۋيمايەۆتىڭ اشۋىن كەلتىردى. ءسويتتى دە ول بۋلدوزەر وتىرىپ، بارلىعىن ءوزى جاساماقشى بولدى. دۇكەننىڭ يەسى ونىڭ بۋلدوزەردەن ءتۇسۋىن تالاپ ەتتى. قارسىلىق تانىتقان جاعدايدا ورتەپ جىبەرەتىنىن ەسكەرتتى. ءبىراق اكىم ورىنباسارى ەرەگەسىپ بۋلدوزەردى وتالدىردى. مۇنى كورگەن كاسىپكەر تۋيمايەۆتىڭ ۇستىنە جانارماي شاشىپ، سىرىڭكە جاعىپ لاقتىرىپ جىبەردى. ءبار-اق ساتتە كولىكتىڭ ءىشى قىزىل جالىنعا اينالدى. اينالاداعىلار ءورتتى ءسوندىرىپ ۇلگەردى. ال اكىم ورىنباسارىن اۋرۋحاناعا الىپ كەتتى"،- دەيدى كۋاگەر.
باسقا دا جانداردىڭ ايتۋىنشا، اكىم ورىنباسارى مانسۋر تۋيمايەۆ بىرنەشە ايلار بويى ياككاباك اۋدانىندا تۇراتىن حالىققا قىسىم كورسەتىپ، ولاردىڭ ۇيلەرى مەن دۇكەندەرىن سۇرگىزىپ تاستاعان.
پىكىر قالدىرۋ