"اياعى تالتايىپ، دەنەسى كوگەرىپ كەتكەنىن كوردىم": شىمكەنتتە جاقىندارى 3 جاسار قىزدىڭ زورلانعانىنا سەنىمدى

/image/2019/07/23/crop-12_3_363x484_mycollages-1.jpg

شىمكەنتتە 3 جاستاعى قىزدىڭ دەنەسى تابىلدى. الدىن الا مالىمەت بويىنشا، ونى اۋەلى زورلاپ، كەيىن ايۋاندىقپەن ءولتىردى دەگەن كۇدىك بار.  قىز بالانىڭ تۋىسقاندارىنىڭ سوزىنشە،  قىز بالانىڭ دەنەسىنىڭ ساۋ-تامتىعى قالماعان، ءتىپتى ىشكى كيىم دە بولماپتى دەپ جازادى Qamshy.kz اقپارات اگەنتتىگى  ەۆرازيا ارناسىنا سىلتەمە جاساپ حابارلايدى.

جانتۇرشىگەرلىك وقيعا شىمكەنتتىڭ قىلمىس كوپ جاسالاتىن اتىشۋلى ىقشام اۋدانىنداعى ەسكى گاراجداردىڭ بىرىندە بولعان. ءۇيدىڭ اۋلاسىندا الاڭسىز ويناپ جۇرگەن كاۋسار بىرنەشە ساعاتقا قاراۋسىز قالىپ، ءىزىم-عايىم جوعالعان. ەڭ ءبىرىنشى قىزىنىڭ جوقتىعىن اناسى بايقاعان. بازاردان كەلگەن ول، بىردەن ونى ىزدەۋگە شىعادى. ابدەن زارە-قۇتى قاشقان باۋىرلارى، حابار بولماعان سوڭ، قۇزىرلى ورگانداردىڭ كومەگىنە جۇگىنەدى. الايدا تەك بىرنەشە ساعاتتان كەيىن جاتاقحانادان نەبارى بىرنەشە ادىم جەردە  ءبۇلدىرشىننىڭ ءولى دەنەسىن ناعاشى اعاسى تاۋىپ الادى.

"گوروحوۆىي كويلەك كيگىزىپ، سول كوكىرەگىندە تۇر. ىشىندە كيىم جوق، تاپاچكاسى جوق، قولىندا تاراعى جوق. مىنانىڭ ءبارى قان عوي. دەنەسىنىڭ ءبارى قان عوي.ءىش كيىمى ءبارىن پوليسيا قىزمەتكەرى تاۋىپ بەردى. سول جەردەن جامان ۇيدەن تاپتى. قىزىمنىڭ سوڭعى ءسوزى، دەمى «ۋف» دەدى ىنىمە قاراپ، بولدى! باسقا ەش بالە ايتپاعان!""، - دەيدى اناسى. 

ءبۇلدىرشىننىڭ تۋىسقاندارىنىڭ سوزىنشە، كاۋساردى تاپقان كەزىندە كويلەگى كوكىرەگىنە دەيىن اشىق-شاشىق بولعان. ودان بولەك، ءۇستى قان-قان كۇيى جاتقان. دەنەسىنىڭ ساۋ-تامتىعى قالماي، كوگەرىپ كەتكەن. وسى فاكتىلەردى نەگىزگە الا وتىرىپ، ءبۇلدىرشىننىڭ تۋىسقاندارى ءسابيدى ايۋاندىقپەن، ازاپتاپ ولتىرگەنىنە سەنىمدى. ويتكەنى ءمايىتحانادان ونىڭ دەنەسىن تىگىپ تاستاپ، قولدارىنا تابىستاپتى.

«ءار ريادتى كورگەنىم سول ەدى، سۇستيىپ شالقاسىنان جاتىر. سول كەزدە تۇرمىن نە ىستەرىمدى بىلمەي، قاسىنا كەلسەم، باسى بەرگى جاعىندا، اياعى ارعى جاعىندا، اياعى تالتايىپ كەتكەن. بۇتىندا ءىش كيىمى جوق. كويلەگىن كوكىرەگىنە دەيىن كوتەرىپ تاستاعان.  ەكى اياعى كوگەرىپ كەتكەن. بەت-اۋزىنىڭ ءبارى كوگەرىپ كەتكەن. ەس-تۇسىن بىلمەيدى. نە ىستەرىمدى بىلمەي، مەن شوكتا تۇردىم»، - دەيدى تۋىسى ايجارقىن ايتپايەۆا.

بالانىڭ دەنەسى تابىلعان ەسكى گاراجدار ەشكىمنىڭ قاراۋىسىنسىز، قاڭىراپ بوس جاتقانىنا بىرنەشە جىلدىڭ ءجۇزى بولعان. ءتىپتى، جەرگىلىكتى قاڭعىباستار، ناشاقور مەن اراق قۇمارلاردىڭ نەگىزگى مەكەنىنە اينالىپ ۇلگەرىپتى. قىزدىڭ اناسىنىڭ سوزىنشە، بۇعان دەيىن دە 7 جانە 8 جاستاعى وقۋشى قىزداردى دا ءدال وسى جەردە زورلاپ كەتكەن.

"بىلتىر دا وسى اي ۋاقىتتا بولدى. ءۇش جىل بولدى قىزدار زورلانعانىنا الدىنعىسى 8، ودان 7، بيىلعىسى 3 جاسار قىز. ءۇش جىلدا ءۇش قىز زورلاندى. سەگىز جاسار ءولدى. كۇدىكتى رەتىندە ديما دەگەن جىگىتتى ۇستاپ وتىر"، - دەيدى اناسى ءبۇلدىرشىن اناسى.

ال قالالىق ىشكى ىستەر دەپارتامەنتى قىز بالانىڭ زورلانعانىن جوققا شىعارۋدا. ويتكەنى، ونىڭ دەنەسىندە ەشقانداي زورلىق-زومبىلىق بەلگىلەرى جوق دەيدى. ساراپتاما ناتيجەسىنە سايكەس، ءۇش جاسار ءبۇلدىرشىن قاراۋسىز قالعان نىساندا بيىكتەن قۇلاپ، ءوز قۇسىعانان تۇنشىعىپ قالعان كورىنەدى. 

ساراپتامانىڭ الدىن-الا قورىتىندىسى بويىنشا، ءجاسوسپىرىم قىزدىڭ ءولىمى قۇلاۋ ناتيجەسىندە «قۇسۋ ماسساسىنىڭ مەحانيكالىق اسفيكسياسىنان»، ياعني ءوز قۇسىعىنا تۇنشىعىپ قالۋ سالدارىنان بولۋى مۇمكىن دەلىنىپ وتىر. 

الايدا مۇنداي ساراپتامامەن قىزدىڭ تۋعاندارى مۇلدەم كەلىسپەيدى. سوندىقتان دا، جوعارعى لاۋازىمدى تۇلعالار وقيعانى ءجىتى نازارىنا السا ەكەن دەيدى. ال قينالىپ، اۋىر ازاپتا كوز جۇمعان بالاقاي 1 ايدان كەيىن 4 جاسقا تولار ەدى.

ەستەرىڭىزگە سالا كەتەيىك، بۇدان بۇرىن شىمكەنتتە ءۇش جاسار ءبۇلدىرشىننىڭ ءولى دەنەسى تابىلعانىن حابارلاعان بولاتىنبىز.

پىكىر قالدىرۋ

قاتىستى ماقالالار