ادام اعزالارىن زاڭسىز الدى دەپ ايىپ تاعىلىپ، 3 ايعا جۋىق ۋاقىت قاماۋعا الىنعان ترانسپلانتولوگ دارىگەر عاني قۇتتىمۇراتوۆتىڭ ىسىنە قاتىستى تاعى ءبىر دەرەك انىقتالدى، دەپ حابارلايدى Qamshy.kz اقپارات اگەنتتىگى Zakon.kz سايتىنا سىلتەمە جاساپ

بۇل ىستە قازاقستاندىق دارىگەرمەن قوسا قىرعىز ازاماتى دا كۇدىككە ىلىنگەن. ال قازاقستاندىق دارىگەردىڭ ارىپتەستەرى ەلىمىزدىڭ باس پروكۋرورى مەن ىشكى ىستەر مينيسترىنەن عاني قۇتتىمۇراتوۆتى تەرگەۋ امالدارى اياقتالعانشا، ۋاقىتشا بوساتۋدى سۇراپ، حات جازىپتى. ولار ونىڭ كىناسى جوقتىعىن ايتىپ، دالەلدەر كەلتىرەدى.

كۇدىكتى تار قاپاستا وتىرىپ، ارىپتەستەرىنە حات جولداعان ەكەن. وندا ول "مەنى يزرايلدىك كومپانيامەن كەلىسە وتىرىپ، شەتەل ازاماتتارىنا زاڭسىز وتا جاسادى دەپ ايىپتاۋدا" دەپ جازعان كورىنەدى. ال، ەلىمىزدەگى بەلگىلى اقحالاتتىلار كەشە باسپا ءسوز ءماسليحاتىن وتكىزىپ، "قۇتتىمۇراتوۆ تەك باسشىلاردىڭ ايتقانىن ورىنداۋشى، ول شەتەلدىك كومپانيالارمەن جەكە دارا كەلىسىمگە كەلمەگەن" دەپ مالىمدەدى.

"2017 جىلى يزرايل كومپانياسى قۇتتىمۇراتوۆ ءبولىم مەڭگەرۋشىسى بولىپ جۇمىس ىستەگەن ۇلتتىق ونكولوگيالىق جانە ترانسپلانتولوگيالىق ورتالىقتىڭ باسشىلىعىمەن قازاقستاندا مەديسينالىق ءتۋريزمدى ۇيىمداستىرۋ ءۇشىن ءتىرى دونوردان بۇيرەك ترانسپلانتاسياسىن جۇرگىزۋ جانە وسى ورتالىقتىڭ بازاسىندا اۋىستىرۋعا شەتەلدىك پاسيەنتتەردى تارتۋ بويىنشا ترانسپلانتتاۋ كەلىسىمشارتىن جاسايدى. شارتتا بارلىق ۇيىمداستىرۋشىلىق، زاڭدىق، قارجىلىق اسپەكتىلەر كورسەتىلگەن. كەلىسىم جاسالعان ساتتەن باستاپ ورتالىققا شەتەلدىك دونورلار دا، رەسيپيەنتتەر دە تۇسە باستايدى"،- دەدى "مەديسينا قىزمەتكەرلەرىنىڭ قۇقىقتارىن قورعاۋ" قوعامدىق بىرلەستىگىنىڭ پرەزيدەنتى نۇرلىبەك وسەربايەۆ.

ءتىپتى اتاقتى ترانسپانتولوگ يۋريي پيا دا "تاعىلعان كىنا اقىلعا قونىمسىز"، - دەيدى.

"ەندى قۇتتىمۇراتوۆ بۇيرەكتى اۋىستىرىپ سالۋ بويىنشا جەكە-دارا اۋرۋحاناعا جاتقىزۋدى، ۇيىمداستىرۋدى جانە وپەراتيۆتىك ارالاسۋدى جۇرگىزدى دەپ ايىپتالۋدا. ارينە، ول ءبولىم مەڭگەرۋشىسى رەتىندە اۋرۋحاناعا جاتقىزۋعا قاتىسقان، ءبىراق ول ونى ۇيىمداستىرۋى، ياعني، پاسيەنتتەرمەن كەلىسىپ، ولاردى تاۋىپ، ولاردىڭ اراسىندا قانداي دا ءبىر كەلىسىم جاساۋى مۇمكىن ەمەس"،- دەيدى "ۇلتتىق عىلىمي كارديوحيرۋرگيا ورتالىعى" اق باسقارماسىنىڭ ءتوراعاسى يۋريي پيا.

ايىپتالۋشىنىڭ قورعاۋشىسى قۇتتىمۇراتوۆ 1ء-شى مامىردان باستاپ قاماۋدا ەكەنىن ايتادى. ول سوتتىڭ سانكسياسىمەن 4 ايعا تەمىر تورعا توعىتىلعان. سونداي-اق، دارىگەرمەن بىرگە شەتەل ازاماتى دا كۇدىككە ءىلىنىپ، قولىنا كىسەن سالىنعان.

"قازىرگى كەزدە ەكى ادام قاماۋدا وتىر. بىرەۋى قۇتتىمۇراتوۆ - دارىگەر، ەكىنشىسى - قىرعىز رەسپۋبليكاسىنىڭ ازاماتى. ايەل ادام اۋدارمامەن شۇعىلدانعان. باسقا ادام ۇستالعان جوق. ەندى شەتەلدىكتەر ورىس ءتىلىن دە، قازاق ءتىلىن دە بىلمەيدى عوي. باسقا ەلدىڭ ازاماتى بولعاننان كەيىن سول كىسىلەردىڭ اراسىندا اۋدارماشى بولىپ قىزمەت جاساعان"،- دەيدى ادۆوكات الديرزا قۋانىشكەرەيەۆ.

قىلمىستىق كودەكستىڭ قوس بابى بويىنشا كۇدىككە ىلىنگەن دارىگەر ءىسىن ىشكى ىستەر مينيسترلىگىنىڭ تەرگەۋ كوميتەتى جۇرگىزۋدە. ءتىپتى مەملەكەتارالىق تەرگەۋ توبى دا قۇرىلعان.

"ادامداردىڭ ورگاندارىن بولماسا تەرىلەرىن زاڭسىز ساۋدالاۋ، بولماسا سوعان ماجبىرلەۋ جانە دە ترانسۇلتتىق توپقا قاتىسۋ ارقىلى قىلمىس جاساۋ بابى بويىنشا تەرگەۋ ءجۇرىپ جاتىر.تەرگەۋ امالدارىن ىسكە اسىرۋ ءۇشىن ءوزارا، ياعني مەملەكەتارالىق، ۆەدومستۆولىق تەرگەۋ توبى قۇرىلىپ وتىر"،- دەيدى ق ر ءىىم رەسمي وكىلى ءنۇردىلدا وراز.

قازاقستاندا ترانسپلانتاسيا جاساۋ وزگە ەلدەرمەن سالىستىرعاندا ارزانىراق. مىسالى، ەۋروپا ەلدەرىندە بۇيرەك ترانسپلانتاسياسى 80 مىڭ دوللاردان 150 مىڭ دوللارعا دەيىن جەتەدى. ال شەتەلدىك ازاماتقا مۇنداي وپەراسيانى قازاقستاندا جاساتۋ ءۇشىن 7-8 مىڭ دوللار كولەمىندە قارجى قاجەت ەكەن.