باعدارلاماعا 4 جانە ودان دا كوپ بالالارى بار كوپ بالالى وتباسىلار، كامەلەتتىك جاسقا تولماعان بالالارى بار تولىق ەمەس وتباسىلار، مۇمكىندىگى شەكتەۋلى بالالارى بار وتباسىلار قاتىسا الادى دەپ حابارلايدى Qamshy.kz اقپارات اگەنتتىگى اتىراۋ وبىلسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.

بۇل تۋرالى وكق-دە وتكەن بريفينگتە اتىراۋ وبلىسى ەنەرگەتيكا جانە تۇرعىن ۇي-كوممۋنالدىق شارۋاشىلىعى باسقارماسىنىڭ باسشىسى مۇرات يعالييەۆ مالىمدەدى.

"اتالعان باعدارلاما ەڭ الدىمەن، از قامتىلعان وتباسىلاردى، ياعني، قازىرگى تاڭدا جالدامالى پاتەرلەردە، باسقا بىرەۋدىڭ پاتەرىندە، ۋاقىتشا تۇراقتاردا تۇراتىن، باستاپقى جارناعا اقشا جيناي المايتىن وتباسىلاردى باسپانامەن قامتاماسىز ەتۋ بولدى. سوندىقتان دا، العاشقى تالاپ – وتباسىلار از قامتىلعان بولۋى ءتيىس. وتباسىنىڭ ءبىر مۇشەسىنە كىرىس 42 500 تەڭگەدەن از بولۋى كەرەك. ياعني، ەگەر بىزگە تەك جولداسى جۇمىس ىستەپ، جارى بالالار كۇتىمىمەن اينالىسىپ، جۇمىس ىستەمەيتىن بولسا، وندا ولاردىڭ تابىسى 255 مىڭ تەڭگەدەن اسپاۋى قاجەت. وسىلايشا، باستاپقى جارنانى جيناۋعا شامالارى جەتپەي جۇرگەن ادامدار ءبىرىنشى كەزەكتە وتەدى"،- دەيدى مۇرات يعالييەۆ.

ايتا كەتەيىك، نەسيە جىلىنا 2 پايىزدىق مولشەرلەمەمەن 19 جىلعا بەرىلەدى. العاشقى جارنا كولەمى – 10 پايىز. اتالعان نەسيە اياسىندا جاڭادان سالىنعان نەمەسە ەكىنشى نارىقتاعى دايىن ۇيلەردى ساتىپ الۋعا بولادى. سونداي-اق، جەڭىلدەتىلگەن نەسيە الۋ ءۇشىن ءوتىنىش بەرۋشىنىڭ جەكە باسىندا جانە ونىمەن بىرگە تۇراتىن وتباسى مۇشەلەرىندە ءوتىنىم بەرگەن كەزدە جەكە باسپانالارى بولماۋى قاجەت.