قىرعىزستاننىڭ بۇرىنعى پرەزيدەنتى المازبەك اتامبايەۆ رەسەي پرەزيدەنتى ۆلاديمير پۋتينمەن كەزدەسۋى تۋرالى ايتتى دەپ حابارلايدى Qamshy.kz اقپارات اگەنتتىگى Sputnik قىرعىزستان سايتىنا سىلتەمە جاساپ.
ولار 24 شىلدە كۇنى كرەملدە جولىققان بولاتىن.
"رەسەي قىرعىزستاننىڭ دوسى ءارى ستراتەگيالىق ارىپتەسى ەكەنىن تاعى ءبىر مارتە دالەلدەدى. الايدا ەلدىڭ ىشكى ماسەلەلەرىن ءبىز ءوزىمىز شەشەمىز"، - دەدى ساياساتكەر.
مالىمدەمەدە ءتۇرلى ماسەلە بويىنشا كەلىسپەۋشىلىكتى شەشۋ ءۇشىن ەكى تاراپ تا ءوز ۇلەسىن قوسۋى كەرەك ەكەنى ايتىلعان.
"بيلىك سوتتا ءىستى قاراعان كەزدە ادىلدىك تانىتۋى كەرەك. قارسىلاستاردى ساياسي قۋدالاۋدى توقتاتقان دۇرىس. جەەنبەكوۆ تاراپىنان وسىنداي قادامدى كورگەن كەزدە وپپوزيسيانىڭ كۇن ءتارتىبى بىردەن وزگەرەدى"، - دەدى قىرعىزستاننىڭ ەكس-پرەزيدەنتى.
ونىڭ ايتۋىنشا، بۇل ءادىس ەلدەگى ساياسي احۋالدى جاقسارتۋعا سەپ بولادى.
"جەەنبەكوۆتىڭ ەل يگىلىگى ءۇشىن جۇمىس ىستەي باستاعانىن جانە وپپوزيسيانىڭ سايلاۋعا دايىندالىپ جاتقانىن كورگەن كەزدە عانا حالىق تىنىشتالادى. ساياسي تۇراقتىلىق ورنايدى. ءبىز بيلىك تاراپىنان ناقتى ىس-ارەكەتتى قىركۇيەك ايىنا دەيىن كۇتەمىز"، - دەدى اتامبايەۆ.
ەسكە سالا كەتسەك، 13 ماۋسىم كۇنى قىرعىزستان پارلامەنتى ارنايى كوميسسيا قۇرعان بولاتىن. كوميسسيا المازبەك اتامبايەۆتىڭ التى قىلمىسقا قاتىسى بار بولۋى مۇمكىن دەگەن قورىتىندى جاسادى. 20 ماۋسىم كۇنى جوگوركۋ كەنەش بۇل قورىتىندىنى ماقۇلداپ، باس پروكۋراتۋراعا جىبەرگەن.
پىكىر قالدىرۋ