ق ر پرەمەر-مينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا مال شارۋاشىلىعىن دامىتۋ، «نۇرلى جەر» مەملەكەتتىك باعدارلاماسىن ىسكە اسىرۋ بارىسى، نۇر-سۇلتان قالاسىندا جەڭىل رەلستى ترانسپورت جوباسىنىڭ قۇرىلىسىن جالعاستىرۋ ماسەلەلەرى قارالدى دەپ جازادى Qamshy.kz اقپارات اگەنتتىگى ق ر پرەمەر-مينيسترىنىڭ رەسمي سايتىنا سىلتەمە جاساپ.

مال شارۋاشىلىعىن دامىتۋ ماسەلەلەرى بويىنشا اۋىل شارۋاشىلىعى ءمينيسترى س. وماروۆ، «قازاگرو» حولدينگىنىڭ باسقارما ءتوراعاسى ە. قاراشوكەيەۆ، باتىس قازاقستان وبلىسىنىڭ اكىمى ع. ەسقالييەۆ، قىزىلوردا وبلىسىنىڭ اكىمى ق. ىسقاقوۆ، سولتۇستىك قازاقستان وبلىسى اكىمىنىڭ ورىنباسارى م. تاسماعانبەتوۆ، اۋىل شارۋاشىلىعى كاسىپورىندارىنىڭ باسشىلارى — «Empire Food» كومپانياسىنىڭ باس ديرەكتورى ا. دجاۆيدان، «ماكينسك قۇس فابريكاسى» كومپانياسىنىڭ ۆيسە-پرەزيدەنتى ر. توقسەيىتوۆا بايانداما جاسادى.

مال شارۋاشىلىعى — ەلىمىزدىڭ اگروونەركاسىپتىك  كەشەنىنىڭ جەتەكشى سالاسى. 2019 جىلدىڭ ءبىرىنشى جارتى جىلدىعىنىڭ ناتيجەسى بويىنشا مال شارۋاشىلىعىندا جالپى ءونىمنىڭ كورسەتكىشتەرى 2018 جىلدىڭ وسىنداي كەزەڭىمەن سالىستىرعاندا 10،5%-عا ءوستى، مال ازىعى داقىلدارىنىڭ ەگىس الاڭى 19-عا ۇلعايدى. 

"ق ر تۇڭعىش پرەزيدەنتى – ەلباسى ن. نازاربايەۆتىڭ تاپسىرماسى بويىنشا اگرارلىق سالانى ساپالى دامىتۋ، ەكونوميكاداعى ونىڭ ۇلەسىن ارتتىرۋ بويىنشا اگروونەركاسىپتىك كەشەندى دامىتۋدىڭ 2021 جىلعا دەيىنگى مەملەكەتتىك باعدارلاماسى قابىلداندى"، — دەپ ق ر پرەمەر-مينيسترى، ق ر پرەزيدەنتى ق. توقايەۆ اۋىل شارۋاشىلىعىندا ەڭبەك ونىمدىلىگىن ارتتىرۋ جانە وڭدەلگەن ءونىم ەكسپورتىن دامىتۋ بويىنشا مىندەتتەردى بەلگىلەگەنىن اتاپ ءوتتى.

بيىلعى 15 شىلدەدە ۇكىمەتتىڭ كەڭەيتىلگەن وتىرىسىندا مەملەكەت باسشىسى اگروونەركاسىپتىك كەشەنگە ستراتەگيالىق ينۆەستورلاردى تارتۋ مىندەتىن قويدى.

اسقار مامين الەۋەتتى ينۆەستورلارمەن بەلسەندى جۇمىس جۇرگىزىپ، ولارعا قولايلى جاعدايلار جاساۋ قاجەتتىگىن ايتتى.

"بۇل جۇمىس ۇنەمى جۇرگىزىلۋى ءتيىس. ءبىزدىڭ ورتاق مىندەتىمىز – سالاعا كەلەتىن ينۆەستيسيالاردى جىل سايىن كەمىندە 30%-عا ارتتىرۋ. 2020 جىلعا قاراي 211 ملرد تەڭگەگە دەيىن، 2021 جىلعا قاراي – 274 ملرد تەڭگەگە دەيىن ۇلعايتۋ قاجەت"، — دەدى اسقار مامين.

جاڭا ءسۇت فەرمالارىن سالۋ ارقىلى وڭدەۋ كولەمىن ۇلعايتۋ الەۋەتى بار، ءسۇت وڭدەۋ كولەمىن 2022 جىلعا قاراي 2،2 ملن تونناعا جەتكىزۋدىڭ بارلىق مۇمكىندىگى بار.

اۋىل شارۋاشىلىعى مينيسترلىگىنە «قازاگرو» حولدينگىمەن جانە وبلىستاردىڭ اكىمدىكتەرىمەن بىرلەسىپ،  ءسۇتتى-تاۋارلى مال شارۋاشىلىعىنىڭ كولەمىن ارتتىرۋ، وتاندىق قۇس شارۋاشىلىعىن دامىتۋ، حالال ءونىم ەكسپورتىن دامىتۋ شارالارىن قابىلداۋ تاپسىرىلدى.  

"نۇرلى جەر" مەملەكەتتىك باعدارلاماسىن ىسكە اسىرۋ بارىسى تۋرالى ق ر يندۋستريا جانە ينفراقۇرىلىمدىق دامۋ ءمينيسترى ر. سكليار، "بايتەرەك" حولدينگىنىڭ ءتوراعاسى ا. ءارىپحانوۆ، ماڭعىستاۋ وبلىسىنىڭ اكىمى س. تۇرىموۆ، تۇركىستان وبلىسى اكىمىنىڭ ورىنباسارى ق. ايتمۇحامەتوۆ، الماتى وبلىسى اكىمىنىڭ ورىنباسارى س. بەسكەمپىروۆ باياندادى.

2019 جىلى شامامەن 13 ملن شارشى مەتر تۇرعىن ءۇي سالۋ جوسپارلانعان. بۇل وتكەن جىلعى كورسەتكىشتەن 500 مىڭ شارشى مەترگە ارتىق. جىل سايىن 6 مىڭ از قامتىلعان وتباسى مەن 3 مىڭ جۇمىس ىستەيتىن جاستاردى باسپانامەن قامتاماسىز ەتۋ مىندەتتەمەسى قابىلداندى.

"بارلىق زاڭنامالىق نورمالار قابىلدانىپ، قاجەتتى قاراجات ءبولىندى"، — دەپ اسقار مامين، الەۋمەتتىك باعىتتاعى تۇرعىن ءۇي كولەمىن تولىعىمەن بەرۋ جانە ساتىپ الۋ بويىنشا ناقتى شارالاردى قابىلداۋ كەرەك ەكەنىن ايتتى.

سونداي-اق، ق ر ۇكىمەتىنىڭ باسشىسى تۇرعىن ءۇيدى سالۋعا، ينجەنەرلىك ينفراقۇرىلىمدى جەتكىزۋگە ۋاقىتىلى دايىندالۋدىڭ ماڭىزى زور ەكەنىن اتاپ ءوتتى.

"مەملەكەت باسشىسى بارلىق تۇرعىن ءۇي باعدارلامالارىن ءبىرتۇتاس تۇرعىن ءۇي ساياساتىنا بىرىكتىرۋدى تاپسىردى. سوندىقتان بيىل 2025 جىلعا دەيىنگى جاڭا "نۇرلى جەر" مەملەكەتتىك باعدارلاماسى قابىلدانادى، ونىڭ اياسىندا 650 مىڭعا جۋىق وتباسى نەمەسە 2 ملن-نان استام ادام جاڭا تۇرعىن ۇيمەن قامتاماسىز ەتىلەدى"، — دەدى اسقار مامين.

نۇر-سۇلتان قالاسىندا جەڭىل رەلستى ترانسپورت جوباسىنىڭ قۇرىلىسىن جالعاستىرۋ ماسەلەلەرى بويىنشا اكىم ا. كولگىنوۆ باياندادى.

"جوبانى وڭتايلاندىرۋ جۇمىستارى جۇرگىزىلدى"، — دەپ ق ر ۇكىمەتىنىڭ باسشىسى، استانا بانكىنە اۋدارىلعان $258 ملن كولەمىندەگى قاراجات نۇر-سۇلتان اكىمدىگىنە جوبانى ودان ءارى جۇزەگە اسىرۋعا قايتارىلاتىنىن ايتتى. ول ەلوردانىڭ قوعامدىق كولىگىن دامىتۋعا ۇلەس قوسادى.