جامبىل وبلىسىندا حالىقتىڭ تابىسىن كوتەرىپ، تۇرمىسىن جاقسارتۋ دۇرىس جولعا قويلىپ، ارنايى جوسپارلار بويىنشا جۇمىستار جۇرگىزىلىپ جاتىر. بۇل تۋرالى وبلىس اكىمى  اسقار مىرزاحمەتوۆ وبلىستىق ءماسليحاتتىڭ كەزەكتەن تىس وتكەن سەسسياسىندا ايتتى. اسقار يسابەك ۇلى وسى جينىدا وبلىستا وسى جىلدىڭ جارتىجىلدىعىندا اتقارىلعان جۇمىستارىن قورىتىندىلاپ، ەسەپ بەردى.

«بۇگىنگى كۇننىڭ ەڭ وزەكتى ماسەلەسى حالىقتىڭ تابىسىن كوتەرىپ، تۇرمىسىن جاقسارتۋ بولىپ وتىر. سول سەبەپتەن جاڭا سايلانعان رەسپۋبليكا پرەزيدەنتى ءوزىنىڭ ۇلىقتاۋ راسىمىندە دە جانە جۋىرداعى ۇكىمەتتىڭ كەڭەيتىلگەن وتىرىسىندا دا وسى ماسەلەنى ەرەكشە اتاپ ءوتتى.ءبىز وبلىسىمىزدا وسى ماقساتقا قول جەتكىزۋدىڭ جولدارىن، تەتىگىن انىقتادىق.

وڭىردە 1 ميلليون 125 مىڭ ادام تۇرادى، ونىڭ 680 مىڭى، ياعني 60 پايىزى اۋىلدا شوعىرلانعان. ەندى حالىقتى بارىنشا قامتۋ، ءارى وسى ماسەلەنى ءتيىمدى شەشۋ ءۇشىن نە ىستەۋ كەرەك؟ قولدانىستاعى باعدارلامالار جىلىنا ورتا ەسەپپەن 35-37 مىڭ ادامدى عانا قامتيدى.

وسى ورايدا وسىنشاما حالىقتىڭ اۋىلدى جەردە تۇراتىندىعى – ول ءبىزدىڭ ۇلكەن مۇمكىنشىلىگىمىز. سەبەبى، ءاربىر اۋىلدىق اۋلا شىن مانىندە – تابىس كوزى.

بۇنىڭ بىردەن ءبىر دالەلى وبلىستاعى اۋىل شارۋاشىلىعى ونىمدەرى كولەمىنىڭ 43 پايىزى جەكە قوسالقى شارۋاشىلىقتارعا تيەسىلى. ال ءسۇت پەن ەتتىڭ 60 پايىزى ءۇي ىرگەسىندەگى مالدان وندىرىلەدى.

بۇدان بولەك، كەيبىر اۋلالاردىڭ تابىسى ايىنا 500 مىڭ تەڭگەنى قۇراپ، جىلىنا 4-6 ميلليون تەڭگەگە جەتىپ وتىر. بۇل مەملەكەتتىك قولداۋسىز. قاجەتتى قولداۋ كورسەتكەن جاعدايدا، تابىس ۇلعايا تۇسپەك. ال قازىرگى ۋاقىتتا وبلىس بويىنشا جقش-نىڭ ورتاشا تابىسى ايىنا 25-30 مىڭ تەڭگەدەن اسپايدى. سەبەبى – ۇيىمداستىرۋ ماسەلەلەرىنىڭ، ايتالىق، ءونىمدى ورتالىقتاندىرىلعان تۇردە ساتىپ الۋدىڭ، ساقتاۋدىڭ، العاشقى وڭدەۋدىڭ، تاسىمالداۋدىڭ، مال ازىعىنىڭ جەتىسپەۋشىلىگىنىڭ، ازىن-اۋلاق قاراجاتتىڭ بولماۋىنىڭ شەشىلمەگەندىگى.

سوندىقتان دا، ءبىرىنشى كەزەكتە قوسالقى شارۋاشىلىقتارعا باعىتتالعان مەملەكەتتىك ساياساتتى قالىپتاستىرا وتىرىپ، ءتيىستى قولداۋ كورسەتسە، كوتەرىلىپ وتىرعان ماسەلەدەن بولەك، باسقا دا ماڭىزدى سۇراقتار شەشىمىن تاپقان بولار ەدى. مىسالى، اۋىل شارۋاشىلىعى ءونىمىن ەسەلەپ كوتەرۋ، قايتا وڭدەۋدى دامىتۋ، يمپورتتى الماستىرۋ، ازىق-تۇلىك باعاسىن تومەندەتۋ، جۇمىسسىزدىقپەن ءتيىمدى كۇرەسۋ، الەۋمەتتىك كومەككە جۇگىنۋشىلەردىڭ سانىن ازايتۋ، جالپى اۋىلدىڭ ءال-اۋقاتىن كوتەرۋگە جول اشىلعان بولار ەدى» – دەدى اسقار مىرزاحمەتوۆ ءوز ەسەبىندە.

قۋانىش كەۋىلىمجاي