2019 جىلى قۇربان ايت مەرەكەسى تامىز ايىنىڭ 11ء-ى كۇنى باستالادى دەپ حابارلايدى Qamshy.kz اقپارات اگەنتتىگى قازاقستان مۇسىلماندارى ءدىني باسقارماسىنىڭ رەسمي سايتىنا سىلتەمە جاساپ.

استرونوميالىق تۇرعىدان ايدىڭ تۋۋى بەيسەنبى كۇنىنە، ياعني 1 تامىزعا سايكەس كەلەدى. ال، 2 تامىز زۋلحيدجا ايىنىڭ ءبىرىنشى كۇنى بولىپ سانالادى.

اراپا كۇنى 10 تامىزعا سايكەس كەلەدى. اراپا – قاجىلار ارافا جوتاسىندا قۇلشىلىق ەتەتىن كۇن.

قاجىلىققا بارماعان مۇسىلماندار ءۇشىن اراپا كۇنى اۋىز بەكىتۋ – مۇستاحاپ (جاعىمدى) امال. ءابۋ قاتادان جەتكەن حاديستە: «اراپا كۇنىنىڭ ورازاسى وتكەن جانە كەلەر جىلداردىڭ كۇنالارىنا كافارات (كەشىرىم) بولادى...» دەلىنگەن.

جاعدايى بار مۇسىلماننىڭ قۇربان شالۋى – ءۋاجىپ (مىندەت). قۇرباندىققا تۇيە، سيىر جانە قوي (ەشكى دە) شالىنادى. قۇرباندىق مالى ايت نامازىنان كەيىن ايتتىڭ ءۇشىنشى كۇنى كۇن باتقانعا دەيىن شالىنادى.

قۇرباندىق ەتىن ۇشكە ءبولىپ تاراتۋعا بولادى. ءبىر بولىگى وزىنە قالادى، ەكىنشى بولىگى اعايىن-تۋىس، كورشىلەرگە بەرىلەدى، ءۇشىنشى بولىگى كومەككە مۇقتاج كىسىلەرگە تاراتىلادى.