بەلارۋس ورتالىق سايلاۋ كوميسسياسىنىڭ ءتوراعاسى ليديا ەرموشينا ونت تەلەارناسىنىڭ "كونتۋرى" باعدارلاماسىنا بەرگەن سۇحباتىندا ەلدە پرەزيدەنت سايلاۋى 2020 جىلى 30 تامىزدا ءوتۋى مۇمكىن ەكەندىگىن ايتتى دەپ حابارلايدى Qamshy.kz اقپارات اگەنتتىگى حاا بەلتا سايتىنا  سىلتەمە جاساي وتىرىپ.

وسك ءتوراعاسى مەملەكەت باسشىسىن سايلاۋعا ءتيىمدى ۋاقىت كوكتەم بولىپ تابىلاتىنىن ايتا كەلە:

"بىزدە قاراشا ايىندا سايلاۋ وتەدى، جەلتوقساندا جاڭا پارلامەنت قالىپتاسىپ ۇلگەرەدى. بۇل دەگەنىمىز، ءۇش ايدان كەيىن پرەزيدەنت سايلاۋىن بەلگىلەۋ كەرەك بولادى. ال سوندا مىنالاردى ءبىز نەگە الماستىردىق؟"، - دەدى ول.

"پرەزيدەنت سايلاۋى كونستيتۋسيادا بەلگىلەنگەن مەرزىمدە وتەدى دەپ ويلايمىن. ياعني، 2020 جىلى 30-تامىز كۇنى. مەنىڭشە، بۇل ۋاقىتتى بەلارۋس رەسپۋبليكاسى پرەزيدەنتىنىڭ سايلاۋى وتەتىن كۇن دەپ اتاۋعا بولادى"، - دەدى ليديا ەرموشينا.

ونىڭ ايتۋىنشا سايلاۋ جازدىڭ كەزىندە بولادى. ەكىنشى جاعىنان، 30-تامىز كۇنى حالىق ەڭبەك دەمالىستارىنان ورالاتىن، ستۋدەنتتەر جوو-عا ورنالاسىپ ۇلگەرەتىن ۋاقىت. ياعني، سايلاۋشىلار تىركەلگەن جەرلەرىندە بولىپ، داۋىس بەرە الادى.

"ءبىراق بۇل ءقازىر بولجام عانا"، - دەپ قوستى ول.

ەسكە سالا كەتەيىك، بەلارۋس باسشىسى الەكساندر لۋكاشەنكو 2019 جىلى وكىلدەر پالاتاسى مەن رەسپۋبليكا كەڭەسىنە سايلاۋ وتەتىنىن، ال پرەزيدەنت سايلاۋى 2020 جىلى بولاتىنىن مالىمدەگەن ەدى.