وزبەكستان پرەزيدەنتى شاۆكات ميرزيويەۆتىڭ كەنجە قىزى شاحنوزا ميرزيويەۆا رەسپۋبليكانىڭ ءبىلىم مينيسترلىگىنىڭ مەكتەپكە دەيىنگى ءبىلىم بەرۋ سالاسىندا ساياسات قالىپتاسىرۋ جانە جۇرگىزۋ باس باسقارماسىنىڭ باسشىسى بولىپ تاعايىندالدى دەپ حابارلايدى Qamshy.kz اقپارات اگەنتتىگى Sputnik وزبەكستان سايتىنا سىلتەمە جاساپ.
2017 جىلدىڭ جەلتوقسانىنان باستاپ بۇگىنگە دەيىن شاحنوزا ميرزيويەۆا مەكتەپالدى مەكەمەلەردىڭ جۇمىسىن ۇيىمداستىرۋ جانە ستراتەگيالىق دامۋ باس باسقارماسىنىڭ باسشىسى ەلەنا تەننىڭ ورىنباسارى بولىپ قىزمەت ەتكەن ەدى. كەيىن بۇل ۆەدومستۆو مەكتەپالدى ءبىلىم بەرۋ ۇيىمدارىنىڭ جۇمىسىن ۇيلەستىرۋ، تالداۋ جانە ستراتەگيالىق دامۋ باسقارماسى بولىپ قايتا قۇرىلدى.
بۇدان بۇرىن حابارلاعانىمىزداي، بيىل ءساۋىر ايىندا شاۆكات ميرزيويەۆتىڭ ۇلكەن قىزى دا باسشىلىق قىزمەتكە كەلدى. دالىرەك ايتقاندا، سايدا ميرزيويەۆا اقپارات جانە بۇقارالىق كوممۋنيكاسيالار اگەنتتىگى ديرەكتورىنىڭ ورىنباسارى بولىپ تاعايىندالدى. ول وزبەكستاننىڭ شەتەلدەگى جاعىمدى بەينەسىن قالىپتاستىرۋ بويىنشا ماسەلەلەردى باسقارادى.
