قازاقستاندىق اۆتوبيزنەس قاۋىمداستىعىنىڭ مالىمەتىنشە، 2019 جىلدىڭ العاشقى جارتىجىلدىعىنىڭ قورىتىندىسى بويىنشا ەلدە تىركەلگەن ءرۋلى وڭ جاقتاعى كولىكتەر سانى 4 پايىزعا ازايعان. اتالعان كەزەڭدە 24 778 وڭ ءرۋلدى كولىك تىركەۋدەن وتكەن. بۇل تىركەلگەن جالپى كولىك سانىنىڭ 5 پايىزىن عانا قۇرايدى. جىل باسىنان بەرگى التى ايدا ەكىنشى نارىقتا 567 700 كولىك تىركەلگەن.

تىركەلگەن وڭ ءرۋلدى كولىكتەردىڭ وندىعىن Toyota برەندىنىڭ تەمىر تۇلپارلارى باستاپ تۇر. ولار 10 972 بىرلىك. كەيىنگى ورىنداردا Mitsubishi (5 197)، Nissan (3 452)، Honda (2 508)، Subaru (1 693)، Mazda (508)، Suzuki (114)، Isuzu (38)، Daihatsu (33)، Mercedes-Benz (28) جايعاسقان.

3 ساۋىردەگى جاعداي بويىنشا ەلدە 142 966 وڭ ءرۋلدى كولىك تىركەلگەن. ولاردىڭ باسىم كوپشىلىگى الماتى قالاسىنا (44 334)، الماتى (42 839) جانە شىعىس قازاقستان وبلىستارىنا تيەسىلى.

وڭ ءرۋلدى كولىكتەردىڭ 45،5 پايىزى (64 مىڭ) Toyota برەندىنىڭ ۇلگىلەرى. ودان كەيىنگى ورىنداردا Mitsubishi (30،5 مىڭ)، Nissan (18،1 مىڭ)، Honda (15 مىڭ) جانە Subaru (8،3 مىڭ). تانىمال ۇلگىلەردىڭ ساپىندا Mitsubishi Pajero، Mitsubishi Delica، Nissan Cefiro، Honda CR-V جانە Toyota Hilux Surf بار.

وڭ ءرۋلدى كولىكتەردىڭ 97،7 پايىزىنىڭ "جاسى" 20 جىلدان اسقان.