مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس كوپبالالى وتباسىدان جانە اتاۋلى الەۋمەتتىك كومەك كورسەتىلەتىن وتباسىدان شىققان بالالارعا قوسىمشا 5 مىڭ گرانت ءبولىندى دەپ حابارلايدى Qamshy.kz اقپارات اگەنتتىگى ق ر ءبىلىم جانە عىلىم مينيسترلىگىنىڭ سايتىنا سىلتەمە جاساپ.

اتالعان گرانتتار جەرگىلىكتى اتقارۋشى ورگاندارمەن كونكۋرستىق نەگىزدە بەرىلەدى. بۇل ءۇشىن وبلىس، رەسپۋبليكالىق ماڭىزى بار قالالار مەن استانا اكىمدەرىمەن كونكۋرستىق كوميسسيالار قۇرىلاتىن بولادى.

كورسەتىلگەن گرانتتارعا كوپبالالى وتباسىدان شىققان نەمەسە اتاۋلى الەۋمەتتىك كومەك كورسەتىلەتىن وتباسىدان شىققان بالالار ۇمىتكەر بولا الادى.

كونكۋرسقا قاتىسۋ ءۇشىن 2019 جىلعى ماۋسىم ايىندا وتكىزىلگەن ۇبت-دان شەكتى بالل جيناۋ كونكۋرستىڭ نەگىزگى شارتى بولىپ تابىلادى.

ۇلتتىق جوعارى وقۋ ورىندارىنا ءتۇسۋ ءۇشىن ۇلتتىق ءبىرىڭعاي تەستىلەۋ ناتيجەسى بويىنشا – كەمىندە 65 بالل، باسقا جوعارى وقۋ ورىندارىنا – كەمىندە 50 بالل، «پەداگوگيكالىق عىلىم» باعىتى بويىنشا – كەمىندە 60 بالل جيناۋ كەرەك.

كونكۋرسقا قۇجاتتار 5 مەن 10 تامىز ارالىعىندا قابىلدانادى.

ءبىلىم گرانتتارىن تاعايىنداۋ جانە جوعارى وقۋ ورىندارىنا قابىلداۋ 25 تامىزعا دەيىن جۇرگىزىلەدى.

كونكۋرسقا قاتىسۋ ءۇشىن قۇجاتتار ءتىزىمى:

1) بەلگىلەنگەن ۇلگىدەگى بلانكىدە ءوتىنىش؛

2) ءبىلىمى تۋرالى قۇجات (قۇجاتتاردى قابىلداۋ كوميسسياسىنا تاپسىرعان كەزىندە ءتۇپنۇسقا)؛

3) ۇبت سەرتيفيكاتى؛

4) 086-ۋ نىسانى بويىنشا مەديسينالىق انىقتاما؛

5) جەكە باسىن كۋالاندىراتىن قۇجاتتىڭ كوشىرمەسى.

سونداي-اق، بالالاردىڭ كوپبالالى وتباسىنان شىققان نەمەسە اتاۋلى الەۋمەتتىك كومەك كورسەتىلەتىن وتباسى قاتارىنان ەكەندىگىن راستايتىن قۇجاتتار كورسەتىلۋى كەرەك.