ىشكى ىستەر ءمينيسترى ەرلان تۇرعىمبايەۆ قاشقىن دەكاندى ەكى كۇننىڭ ىشىندە تاۋىپ بەرۋگە تاپسىرما بەردى دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.

Nur Otan پارتياسىندا وتكەن قوعامدىق قابىلداۋ كەزىندە استانالىق گۇلزينا مۇسايەۆا ارىزداندى. ول ءمينيستردىڭ الدىنا كەلىپ جايعاسقاندا، تۇرعىمبايەۆ قولىنداعى قاعازدارىنا قاراپ وتىرىپ: "اقتايەۆ بويىنشا ما؟ سوندا مىنا اقشانى كارتوچكامەن تولەدىڭىز بە؟"، - دەپ سۇرادى. "ءيا، كارتوچكاعا، ۋنيۆەرسيتەتكە ەمەس، ءوز اتىنا تولەپ وتىردىق"، - دەدى مۇسايەۆا.

مينيستر ونىڭ ارىزىن ءبىراز وقىدى دا، الدىمەن ءوز ورىنباسارىنان، سودان كەيىن بەينەبايلانىس ارقىلى جامبىل وبلىستىق ىشكى ىستەر دەپارتامەنتىنىڭ باسشىلىعىنان اقتايەۆتىڭ نەگە ۇستالماي جاتقانىن سۇرادى.

"مۇسايەۆانىڭ ارىزى بويىنشا نەگە شارا قابىلدامايسىزدار؟ ۋنيۆەرسيتەتتىڭ بىلدەي فاكۋلتەت دەكانى اقشانى الىپ، تىعىلىپ ءجۇر. ونى قالاي ۇستاي الماي جۇرسىزدەر؟ وسىنى تۇسىنبەي وتىرمىن"، - دەدى تۇرعىمبايەۆ.

دەپارتامەنت باسشىسىنىڭ مىندەتىن اتقارۋشى باۋىرجان ۇدەرگەنوۆتىڭ ايتۋىنشا، قىلمىستىق ءىس قوزعالدى. دەكاننىڭ مەكەنجايى بويىنشا تەكسەرگەندە ۇيىندە جوق بولىپ شىعىپتى. ال ۇيالى تەلەفونى الماتى وبلىسىندا جۇرگەنىن كورسەتىپ تۇر ەكەن. مينيستر الاياق دەكاندى ەكى كۇن ىشىندە قۇرىقتاۋدى تاپسىردى.

"ەكى كۇننىڭ ىشىندە ماعان ونى تاۋىپ بەرىڭدەر. سىزدەردە بارلىق تەحنيكالىق مۇمكىندىك بار. ول قۇجاتسىز جۇرگەن كيللەر ەمەس قوي. ازاماتتىق تۇلعا، بۇرىن سوتتالماعان. رەسمي جۇمىس ىستەيدى. ونداي ادامدى تابۋ قيىن ەمەس. ەكى كۇن بەرەمىن. تابىڭدار دا، اقشانى كىمگە جانە قالاي اۋدارعانىن انىقتاڭدار. ول اقشانى يەمدەنىپ كەتسە، الاياقتىق بويىنشا ءىس قوزعاڭدار دا، جازاعا تارتىڭدار"، - دەپ تۇرعىمبايەۆ ءسوزىن تۇيىندەدى.