قازاقستاننىڭ ءبىلىم جانە عىلىم ءمينيسترى اسحات ايماعامبەتوۆ مەكتەپ وقۋلىعىنان قاتە تاپقانىن مالىمدەدى دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.
"وقۋلىقتاردىڭ ساپاسىنا قاتىستى ماسەلە جىل سايىن كوتەرىلەدى. قوعام تاراپىنان كوپ سۇراق قويىلىپ، سىن-ەسكەرتپە ءجيى ايتىلادى. شىنى كەرەك، پروبلەما بار، قاتەلەر كەزدەسەدى. بىرەۋلەر قاتە باسىلىپ كەتتى دەيدى، ەندى بىرەۋلەر تەحنيكالىق اقاۋلىق دەپ اقتالادى. الايدا حالىقتى بۇل سەبەپتەر قىزىقتىرمايدى. حالىققا ساپالى وقۋلىق كەرەك"، - دەدى ايماعامبەتوۆ استانادا وتكەن جيىندا.
مينيستر ءوزى دە مەكتەپ وقۋلىقتارىنان قاتە تاپقانىن جەتكىزدى. ونىڭ سوزىنە قاراعاندا، ورىس ادەبيەتى وقۋلىقتارىندا كەيىپكەرلەردىڭ بىرەسە اتى، بىرەسە فاميلياسى جازىلادى. بۇدان بولەك، اعىلشىن سوزدەرى قازاق جانە ورىس تىلدەرىنە دۇرىس اۋدارىلمايدى.
"مەن ءوزىم ادەيى بىرنەشە وقۋلىقتى الىپ قارادىم. شىنىمدى ايتسام، ءوزىم دە بىرنەشە قاتە تاپتىم. ول قاتەلەر قايدان شىعىپ جاتىر؟ مينيسترلىككە نە ىستەۋ كەرەك؟ بۇگىن وسى جايىندا سويلەسەمىز"، - دەپ اتاپ كورسەتتى ايماعامبەتوۆ.
رەسمي مالىمەتكە سايكەس، بۇگىندە وقۋلىقتاردىڭ 40 پروسەنتى مەكتەپتەرگە جەتكىزىلدى. 1 قىركۇيەككە دەيىن وسى جۇمىستى تولىعىمەن اياقتاۋ جوسپارلانىپ وتىر.
پىكىر قالدىرۋ