كورشى قىرعىزستاندا قازىرگى پرەزيدەنت پەن بۇرىنعى پرەزيدەنت اراسىنداعى تالاس اتىس-شابىسقا ۇلاسىپ كەتتى: اتامبايەۆتى تۇتقىنداۋ جونىندەگى ارنايى وپەراسيا باستالدى. تىكەلەي ەفيرگە قاراساق، قان توگىلىپ جاتقان سىڭايلى!
الاتاۋدىڭ ار جاعىنداعى ەكى قوشقاردىڭ باسى ءبىر قازانعا سىيماي جاتقانىنىڭ سەبەپتەرى بەلگىلى. توقسان اۋىز سەبەپتىڭ توبىقتاي ءتۇيىنى – وسى سوعىستىڭ نەگىزىندە بيلىك پەن بايلىق جاتىر. كەز كەلگەن جۇيەدە وسى ەكى قۇندىلىق بىر-بىرىمەن استارلاسىپ جاتاتىنى بەلگىلى. مويىنداۋ كەرەك، دەموكراتيالىق دەگەن ەلدەرگە دە بۇل جات قۇبىلىس ەمەس.
وسى وقيعانىڭ وربۋىنە قاراپ، كوز الدىما قازاقستاندى ەلەستەتەمىن.
بۇگىندە بيلىككە تالاسقان كلاندار اراسىنداعى تەپە-تەڭدىكتىڭ فورمالدى كەپىلى بولىپ وتىرعان نازاربايەۆ ومىردەن وتسە، بىزدەگى جاعداي قانداي بولماق؟
بۇرىن دا ايتىپ ءجۇرمىن، ءقازىر دە قايتالايىن: بىزدە بىر-بىرىنە جۇلدىزى قارسى، ءبىر-بىرىن اتارعا وق تابا الماي وتىرعان، بەس قارۋى ساي، ياعني بيلىككە قول جەتكىزۋگە قاجەت بارلىق ينفراقۇرىلىمى (كاپيتال، مەنشىك، مۇلىك، بيزنەس، بانك، ب ا ق، قوعامدىق قۇرىلىمدار جانە ادامي رەسۋرس) بەس-التى كلان بار. ءارقايسىسى – «سەن تۇر، مەن اتايىن»!
ەرتەڭگى كۇنى، جەمە-جەمگە كەلگەندە سول «اتايىن» دەگەندەرى ناقتى ىسكە، اتىسقا ۇلاسىپ كەتۋى ابدەن مۇمكىن! تاق تالاسى جولىندا ازۋىن ايعا بىلەگەن ولار، قاجەت بولسا، دەموكراتيالىق ۇرانداردى كوتەرىپ، ساياسي كۇرەستىڭ بارلىق مۇمكىندىكتەرىنە قارۋلى قارسىلاستىق سەكىلدى ءادىس-تاسىلدى قوسۋى ىقتيمال!
ول ءۇشىن نە ىستەۋ كەرەك؟
ەكى عانا جول بار.
بىرىنشىدەن، قىرعىزستاندا قولعا الىنعانداي (ۋكراينا دا سول جولعا تۇسەيىن دەپ جاتىر) پرەزيدەنت، باسقا دا لاۋازىمدى تۇلعالاردىڭ يممۋنيتەتىن جويۋ كەرەك. سوندا عانا ولار حالىق پەن تاريح الدىنداعى جاۋاپكەرشىلىكتى ۇمىتپايدى، اقىرىن ءجۇرىپ، انىق باسادى. ەرتەڭگى كۇنى جاۋاپقا تارتىلاتىنداي قىلمىسقا بارمايدى.
ەكىنشىدەن، ءبىر پرەزيدەنت وزىنە دەيىنگى پرەزيدەنتتەن ءوشىن الىپ، جەكە باس كەگىن قايتارماۋى ءۇشىن بىزگە تۇلعالىق ەمەس، ۇجىمدىق تۇردەگى كەپىلدىك كەرەك. ونىڭ اتى – كوپپارتيالى ءارى اتقارۋشى بيلىككە (پرەزيدەنتكە دە!) تاۋەلدى بولمايتىن پارلامەنت! اتىس-شابىس ەمەس، ايتىس-تارتىس سول پارلامەنتتىڭ ىشىندە ءجۇرىپ جاتسىن.
سوندا عانا ەندى عانا باستالىپ جاتقان ترانزيت كەزىندە ەلىمىزدىڭ تاۋەلسىزدىگى مەن تۇتاستىعىن ساقتاپ قالا الامىز!
ءامىرجان قوسانوۆتىڭ پاراقشاسىنان الىنعان
پىكىر قالدىرۋ