مىنە، جايدارلى جاز دا سوڭىنا تاقاپ قالدى. ەندى از ۋاقىتتان سوڭ جاڭا وقۋ جىلى باستالىپ، سىرتتان كەلەتىن ستۋدەنتتەردىڭ باسپاناعا دەگەن سۇرانىسى ارتادى. سۇرانىسقا ساي باعا دا اسپانداپ كەتەتىنى بار، – دەپ حابارلايدى Qamshy.kz اقپارات اگەنتتىگى.

Nv.kz سايتى ادەتتە  ءۇيدىڭ جالداۋ اقىسى وندا تۇراتىن ادام سانىنا تىكەلەي بايلانىستى دەپ جازادى. ارتىعىمەن ايتقاندا رەمونتى ورتاشا پاتەرلەردىڭ باعاسى الماتىدا ءبىر ادامعا ايىنا 50 مىڭ تەڭگەگە دەيىن شىعادى. ەكى ادام 65-70 مىڭ تەڭگەگە جاقسى پاتەر جالداي الادى. تولىقتاي جيھازدالعان ءبىر بولمەلى پاتەرلەر 90 مىڭنان باستالادى. ورتاشا جاعدايداعى ەكى بولمەلى پاتەرلەر 80 مىڭعا تابىلسا، قاجەتتى جيھازدىڭ بارلىعىمەن جاراقتاندىرىلعانى 150 مىڭ تەڭگە شاماسىندا. ءۇش بولمەلىلەردى 170 مىڭ تەڭگەگە جالداۋعا بولادى.

بۇل سيفرلار كوپقاباتتى ۇيلەردەگى پاتەرلەرگە قاتىستى. ال قالا ماڭىندا ءبىر، ەكى بولمەلى "ۆرەميانكالاردا" تۇراتىنداردىڭ قاتارى دا از ەمەستىگىن ۇمىتپاعان ءجون. ءتىپتى ولاردىڭ سانى كوپتەۋ بولسا تاڭعالارلىق ەشتەڭەسى جوق. ونداي «ۇيلەردە» جالداۋ اقىسى ارزان. شامامەن ايىنا ءبىر بولمە ءۇشىن 25 مىڭ تەڭگەدەن باستالادى. وندا بىرنەشە ادام تۇرۋى مۇمكىن. سايكەسىنشە جاعدايى دا ءماز ەمەس. بىرىنشىدەن قالا ورتالىعىنان قاشىق. رەمونتى ناشار. كەيبىرى ساپاسىز سالىنعاندىقتان كوك ساسيدى. ودان كەيىن تۇرمىستىق تەحنيكا، ۆاننا، دۋش سياقتى قاجەتتىلىكتەر ىلۋدە بىرەۋىندە بولماسا، كوبىندە جوق. سەبەپ، ونداي اۋدانداردىڭ دەنى ورتالىقتاندىرىلعان كارىز جۇيەسىنە قوسىلماعان. قالتانىڭ كوتەرەتىنى سول بولعاندىقتان ونداي پاتەرلەردى اۋىلدىڭ قاراپايىم قازاعى قورىعىش كەلەدى.