قىرعىزستاننىڭ ەكس-پرەزيدەنتى المازبەك اتامبايەۆتى تۇتقىنداۋ ماقساتىندا جاساقتالعان ارنايى توپتىڭ بىرنەشە ساربازى تۇتقىنعا ءتۇسىپ قالعان. اتامبايەۆ جىگىتتەرىنىڭ قولىندا بولىپ، اۋىر جارالانعان اسكەر كورگەن-بىلگەنىن ايتىپ بەردى دەپ جازادى Qamshy.kz اقپارات اگەنتتىگى.
سۇحبات اۋرۋحانادا جاتقان جىگىتتەن الىنعان. وقيعا تۋرالى تەرىس قاراپ جاتىپ ايتقان جىگىت ءوزىنىڭ تۇتقىندا بولعانىن، اتامبايەۆ جىگىتتەرىنىڭ اياۋسىز ساباعانىن، باسى جارىلىپ، اياق-قولى سىنعانىن جەتكىزدى.
ونىڭ ايتۋىنشا، العاشىندا اسكەرلەر رەزينا وقتى اسپانعا اتقان. ال قارسى توپ بۇلاردى تاسپەن، تەمىرمەن، قورعاسىن وقپەن كۇتىپ العان-مىس. سونىمەن قاتار، وپەراسيا باستالا سالىسىمەن بىرنەشە جىگىت اۋىر جاراقات الىپ، اۋرحاناعا جونەلتىلگەن.
توسەككە تاڭىلعان اسكەردىڭ ايتۋىنشا، ولار قاجەتتى قارۋ-جاراق الىپ بارماعان. سونداي-اق، قاراڭعىدا بىر-بىرىنەن كوز جازىپ قالىپتى.
جارالى اسكەر قازا تاپقان قارۋلاسىن سوڭعى رەت ۇيگە كىرگەندە كورگەنىن ايتادى.
«ءبارىمىز بىرگە كىرگەنبىز. سوسىن قارسى توپتان ساقالدى، بويشاڭ بىرەۋ شىعىپ "سويلەسەيىك" دەدى. ءبىز ەكىنشى قاباتقا كوتەرىلىپ كەتتىك. ولار ءبىرىنشى قاباتتا قالعان. ودان كەيىن كورمەدىم»، - دەيدى جارالى اسكەر.
ەسكە سالا كەتەيىك، 7-تامىز كۇنى قوي-تاشتاعى رەزيدەنسياسىندا اتامبايەۆتى تۇتقىنداۋ وپەراسياسى جۇرگىزىلگەن-دى. اتالمىش ورىندا قاقتىعىس بولىپ، ءبىر سارباز قازا تاپقان. سونداي-اق بىرنەشە جىگىت اۋىر دەنە جاراقاتىن العان.
پىكىر قالدىرۋ