اقتوبە وبلىسىنىڭ شالقار قالاسىندا جول جوندەۋگە بولگەن اقشانى شەنەۋنىكتەر تالان-تاراجعا سالعان. ءقازىر تەرگەۋشىلەر اكىمدىكتەگىلەردەن ول قارجىنى قايدا جۇمساعاندارىن سۇراپ جاتىر، دەپ حابارلايدى كتك ارناسى. 

«شالقار قالاسى تۇڭعاتاروۆ، بورانباي ۇلى جانە بوستاندىق، قاراعۇل كوشەلەرىنىڭ اۆتوكولىك جولدارى بويىنشا جاسالماعان جۇمىستاردى قابىلداۋ ارقىلى اسا ءىرى مولشەردە، ياعني وتىز ميلليونعا جۋىق تەڭگە كولەمىندەگى سەنىپ تاپسىرىلعان بوتەن مۇلىكتى يەمدەنىپ الۋ جانە تالان-تاراجعا سالۋ دەرەگى بويىنشا سوتقا دەيىنگى تەرگەۋ باستالدى”، - دەدى اقتوبە وبلىستىق پروكۋراتۋراسى باسقارماسىنىڭ اعا پروكۋرورى جانىبەك تورەبەكوۆ. 

شالقارداعى ءتورت كوشەگە تاس توسەلگەندە تۇرعىندار قۋانعان ەدى. كەيىن ريەۆيزيالىق كوميسسيا تەكسەرۋگە كىرىسكەندە جۇمىستىڭ جارتىلاي ىستەلىپ، ءبيتتىڭ قابىعىنداي اسفالت قۇيىلعانىن كورەدى. ال قازىنادان بولىنگەن اقشانى مەردىگەرگە اۋدارا سالعان. ءتىپتى شەنەۋنىكتەر اتقارىلعان جۇمىسقا قاتىستى جالعان قۇجاتتار ازىرلەگەن. ەندى سول ءۇشىن اۋداندىق اكىمدىكتىڭ باسشىلارى مەن اۆتوكولىك جولدارى ءبولىمىنىڭ وكىلدەرى جاۋاپقا تارتىلىپ جاتىر. 

ايتا كەتەيىك، بۇعان دەيىن شالقاردىڭ شۇرىق-تەسىك جولىنا قاتىستى بۇرىنعى ءبولىم باسشىسى اقشانىڭ جوقتىعىن ايتىپ كۇلكىگە قالعان ەدى. قارجى بولسە قاتىرامىز دەگەن بولاتىن.