تەكەلى قالاسىنىڭ اكىمى تۇرعىنداردان كەشىرىم سۇرادى. باقتيار ونەربايەۆ تۇتاستاي ءبىر مونوقالانىڭ اۋىزسۋ ماسەلەسىن شەشە الماي جاتقانىن مويىنداپ وتىر دەپ حابارلايدى Qamshy.kz اقپارات اگەنتتىگى ەۋرازيا ارناسىنا سىلتەمە جاساپ.

ويتكەنى، تۇرعىندار تىرشىلىك ءنارىن باستاۋدان تاسۋعا ءماجبۇر. ال، ورتالىقتاندىرىلعان اۋىزسۋ ىشۋگە جارامايتىن كورىنەدى. كۇن ىسىسا، لايلانىپ كەتەدى ەكەن. تەكەلى قالاسى تۇرعىندارىن جاز بويى ابىگەرگە سالاتىن بۇل ماسەلە قاشان شەشىلمەك؟ بۇل تۋرالى ەۋرازيا ءبىرىنشى ارناسى حابارلايدى. 

"مەن حالىقتان كەشىرىم سۇرايمىن. اكىم رەتىندە وسى ماسەلەنى شەشپەگەنىمە. ءبىراق، بۇل باعىتتا جۇمىس ىستەپ جاتىرمىز. وبلىس اكىمى دە بىلەدى، وبلىستىق ۋپراۆلەنيەدەگىلەر دە بىلەدى"، - دەدى تەكەلى قالاسىنىڭ اكىمى باقتيار ونەربايەۆ. 

بىلدەي ءبىر اكىمدى كەشىرىم سۇراۋعا ماجبۇرلەگەن الەۋمەتتىك جەلىدەگى  بەينەجازبا. تۇرعىنداردىڭ ايتۋىنشا، كراننان اققان اۋىز سۋ مۇلدە ىشۋگە جارامسىز. ونى ءىشۋ بىلاي تۇرسىن، جاڭبىرلى كۇنى كيىم جۋا المايمىز. ءقازىر تەك، دارەتحاناعا پايدالانعانىمىز ءۇشىن اقشا تولەپ وتىرمىز، - دەيدى.

"47 تەڭگە عوي ديم 1 كۋبىنا تولەيمىز. ەگەردە 3-4 كۋب بولسا، ءجۇز بالمەباي تەڭگە تولەيمىز. ءىشۋ مۇمكىن ەمەس. توپىراق تاتيدى. ال، مەندە نەمەرەلەر كەلەدى. بالالارعا بەرۋ وپاسنو مىنانداي سۋدى بەرۋگە"، - دەدى تەكەلى قالاسىنىڭ تۇرعىنى ءدانيا احمەت قىزى.

كۇندەلىكتى تۇتىناتىن اۋىز سۋدى تۇرعىنداردىڭ ءبىرى ساتىپ السا، ال، ءبىرى يت-قۇس كەلىپ، ءشول باساتىن باستاۋدان تاسىپ ىشەدى. اينالاسى دا سانيتارلىق تالاپقا ساي ەمەس. 

"التىدان كەيىن كەلىپ، وسىندا كەزەككە تۇرامىز. 1 ساعاتتاي كەزەكتە تۇرىپ، ارەڭ سۋ الىپ كەتەمىز. قولىمىزدى تاستاي سۋعا سالىپ، نەشە ءتۇرلى ىدىستاردى سالىپ سۋ الامىز"، - دەدى قالا تۇرعىنى بەرداق بۋرييەۆ. 

ەڭ سوراقىسى شاھارداعى №1ء-شى بالاباقشا ۇجىمى دا لاي سۋدى پايدالانىپ وتىر ەكەن. الايدا، مۇنداعىلار ونى مۇلدە تۇتىنبايمىز دەپ اقتالدى. سوزدەرىنە سەنسەك، ىستىق سۋدى قايتا قايناتىپ ىشەدى ەكەن. 

"بىزدە ىستىق سۋ باسقا جاقتان كەلەدى. سونى سۋىتىپ قويىپ، قايناتىپ بەرەمىز. جامان سۋدى پايدالانبايمىز"، - دەدى بالاباقشا مەدبيكەسى ءنازيپا سۇلتان قىزى. 

الايدا، ەلى مەكەندى اۋىز سۋمەن قامتىپ وتىرعان "تەكەلى سۋ قۇبىرى" مەكەمەسىنىڭ باسشىسى بۇل تىرشىلىك ءنارىن جارامدى دەپ سانايدى. 

"ىشۋگە جارايدى ول. نەگە دەسەڭىز، ءبىز كۇن سايىن ءوزىمىزدىڭ لوبوروتوريادان سۋدىڭ قۇرامىن، تازالىعىن، ءبارىن تەكسەرىپ وتىرامىز. ايىنا ءبىر رەت ءوزىمىزدىڭ سەس-كە ەسەپ بەرەمىز"، - دەدى "تەكەلى سۋ قۇبىرى" مم ديرەكتورى باقىت سالييەۆ. 

لاي سۋدى پايدالانىپ وتىرعان تۇرعىندار ماسەلەنىڭ شەشىلۋىن تالاپ ەتۋدە.

ال، جاۋاپتىلاردىڭ سوزىنە سەنسەك، تازا تىرشىلىك ءنارىن ءالى بىر-ەكى جىل كۇتۋلەرىنە تۋرا كەلەدى. ويتكەنى، ءقازىر جوبالىق-سمەتالىق قۇجاتتارى دايىندالىپ جاتىر ەكەن.