قازاقستاندا 9 ماۋسىمدا وتكەن سايلاۋدان كەيىن قۇرىلعان "رەسپۋبليكا قوزعالىسى" جاستار ۇيىمى ەلدى 30 جىلعا جۋىق بيلەگەن نۇرسۇلتان نازاربايەۆتىڭ 21 تامىزدا بيلىكتەگى "نۇر وتان" پارتياسىنىڭ ساياسي كەڭەسىنىڭ كەڭەيتىلگەن وتىرىسىندا ەلدەگى سايلاۋ زاڭدارى مەن ءوتۋ مەرزىمىنە قاتىستى ايتقان سوزىنە پىكىر ءبىلدىردى دەپ جازادى Qamshy.kz اقپارات اگەنتتىگى. بۇل تۋرالى اتالعان ۇيىمنىڭ الەۋمەتتىك جەلىدەگى پاراقشاسىندا ارنايى ۆيدەوجازبا جاريالاندى.
اتالعان ۆيدەوجازبادا "رەسپۋبليكا قوزعالىسى" جاستار ۇيىمىنىڭ وكىلى بەللا ورىنبەتوۆا نازاربايەۆتىڭ "پارلامەن سايلاۋىنا ماجوريتارلىق جۇيەنى قايتارۋ كەرەك دەيتىن جەكەلەگەن وپونەنتتەر مەن بلوگەرلەر بيلىكتى سىنايدى. ولاردىڭ ءسوزى ادەتتەگىدەي جالاڭ سوزگە قۇرىلعان، ناقتى ۇسىنىستارى جوق" دەپ ايتقانىن سىنعا الدى. ورىنبەتوۆانىڭ ايتۋىنشا، "پارلامەنت سايلاۋى ماجوريتارلىق جۇيەدە وتسە، حالىققا ءتيىمدى بولادى".
"ءبىز سوڭعى ۋاقىتتاردا حالىققا "سەن بە ەدىڭ مەنى سايلاعان" دەپ دىكەڭدەگەن دەپۋتاتتاردى كورىپ ءجۇرمىز. ءبىر جاعىنان ولاردىڭ ءسوزىنىڭ جانى بار. ولاردى تاڭداعان حالىق ەمەس، ولاردى تاڭداعان پارتيا ءتوراعاسى. ياعني، ويلاپ قاراڭىزشى، ولار پارتيانىڭ ءسوزىن سويلەيدى مە، حالىقتىڭ ءسوزىن سويلەيدى مە...؟ ال ماجوريتارلى جۇيە بويىنشا سايلانعان دەپۋتات حالىقتىڭ الدىنداعى جاۋاپكەرشىلىگىن سەزىنەدى"، - دەدى ورىنبەتوۆا.
سونىمەن قاتار ورىنبەتوۆا نازاربايەۆتىڭ "بارلىق سايلاۋلار كونستيتۋسيالىق مەرزىمدە وتەدى" دەگەنىنە كۇمانمەن قارايتىنىن جاسىرمادى.
"نۇرسۇلتان ءابىش ۇلى ەل باسقارعان 29 جىلدا قانداي ۋادەلەر بەرگەن ەدى؟ "استانا قالاسىنىڭ اتاۋى وزگەرمەيدى"، "تەڭگە قۇلدىرامايدى" دەگەن. سوندىقتان بۇل جولعى ۋادەنىڭ قانشالىقتى سەنىمدى ەكەنىن ءبىر قۇداي بىلەدى"، - دەدى بەللا ورىنبەتوۆا.
"رەسپۋبليكا قوزعالىسى" جاستار ۇيىمى 2019 جىلدىڭ 9 ماۋسىمىندا وتكەن پرەزيدەنت سايلاۋىنان كەيىن قۇرىلعان. اتالعان ۇيىم 24 ماۋسىمدا تۇركىستان وبلىسى ارىس قالاسىندا بولعان جارىلىس كەزىندە ۆولەنتەرلىق قىزمەت اتقاردى. الەۋمەتتىك جەلىدە ۇيىم بەلسەندىلەرى قازىرگى بيلىك جۇيەسىنە قارسى ەكەندەرىن اشىق ايتىپ ءجۇر.
♦وقي وتىرىڭىزدار: نازاربايەۆ: بارلىق سايلاۋلار كونستيتۋسيالىق مەرزىمدە وتەتىن بولادى
پىكىر قالدىرۋ