وپپوزيسيالىق باعىتتاعى "ازات" جسدپ-نىڭ مۇشەسى، قازاقستاننىڭ بۇرىنعى ۆيسە-پرەمەرى بالتاش تۇرسىمبايەۆ ەلدى 30 جىلعا جۋىق باسقارعان، بۇگىندە بيلىكتەگى "نۇر وتان" پارتياسىنىڭ ءتوراعاسى بولىپ وتىرعان نۇرسۇلتان نازاربايەۆتىڭ 21 تامىزدا پارتيانىڭ ساياسي كەڭەسىنىڭ كەڭەيتىلگەن وتىرىسىندا كوپ بالالى انالارعا قاراتا ايتقانىن "ساسقان ادامنىڭ سوزىنە" تەڭەدى دەپ جازادى Qamshy.kz اقپارات اگەنتتىگى. بۇل تۋرالى ساياساتكەر ازاتتىق راديوسىنىڭ "AzattyqLive" باعدارلاماسىنا بەرگەن سۇحباتىندا ايتتى. 

نازاربايەۆ سول جيىندا "كوپ بالالى انالار "ماعان بەر، مەنىڭ بالام كوپ، ايلىعىم از" دەيدى. سەن نە ويلادىڭ؟ بۇل – سەنىڭ ماسەلەڭ عوي، سەن بۇرىن مەملەكەتپەن اقىلداسپادىڭ عوي". ميكروكرەديت ال دا ەكى سيىر ساتىپ ال. ءوزىڭدى اسىرا" دەگەن بولاتاتىن.

ساياساتكەر تۇرسىمبايەۆ بۇرىنعى پرەزيدەنتتىڭ بۇل سوزدەرىنەن ونىڭ "قاتتى ساسىپ وتىرعانىن" ايتتى. 

"نازاربايەۆتىڭ مالىمدەمەسىنەن بايقاعانىم - نۇرسۇلتان مىرزا قاتتى ساسىپ وتىر. ساسقان ادام عانا سوندايدى ايتادى. نەگە دەسەڭىز، ءبىز كوپ بالالى انالاردى الاقانىمىزدا ۇستاۋىمىز كەرەك. ولار ءبىزدىڭ دەموگرافيانى تۇزەيدى. ءبىزدىڭ ۇلان بايتاق جەرىمىزگە بەس فرانسيا، ءۇش تۇركيا سيادى. سول جەردى ساقتاپ قالۋ ءۇشىن ءبىز حالىقتىڭ سانىن كوبەيتكەنىمىز ءجون. نازاربايەۆ ەلدى باسقارعان 30 جىلدا ءبىزدىڭ سانىمىز ءۇش ميلليونعا عانا ءوستى. ونىڭ وزىندە 1 ميلليون ادام شەتەلدەن كەلگەن قانداستارىمىز. سوندا قوسقانىمىز بارلىعى 2 ميلليون عانا. ەگەر ءدال وسىلاي 30 جىلدا ەكى ميلليون عانا كوبەيەتىن بولساق، ءبىزدىڭ جەرىمىز بوس قالادى. سوندىقتان كوپ بالالى انالارعا بارلىق جاعدايدى جاساۋىمىز كەرەك"، - دەدى تۇرسىمبايەۆ. 

سونداي-اق تۇرسىمبايەۆ ەكس-پرەزيدەنتتىڭ "بارلىق سايلاۋلار كونستيتۋسيالىق مەرزىمدە وتەدى" دەگەن سوزىنە ەشقانداي كەپىلدىك جوق ەكەنىن ايتتى. 

"مىسالى، نازاربايەۆ بۇگىن "سايلاۋ ۋاقىتىندا وتەدى" دەپ ايتادى دا بەس كۇننەن كەيىن سايلاۋ وتكىزىۋ تۋرالى ۇكىم جازىپ، قول قويىپ، (ءقازىر ءتىپتى ءوزى جازبايدى دا، جازاتىن ادام بار) ءبىر ايدان كەيىن سايلاۋ وتكىزىپ جىبەرۋى مۇمكىن. سايلاناتىن ادامداردى دا ءوزى تاڭدايدى. مەن ءقازىر ساياساتكەر رەتىندە، ساراپشى رەتىندە بۇعان ەشتەڭە ايتا المايمىن. ەشقانداي كەپىلدىك جوق. ەگەر نۇرەكەڭ (رەد. ن. نازاربايەۆ) جاقسى ۇيىقتاسا، پارلامەنت تارامايدى. ال  تۇسىندە پارلامەنتتەگىلەر ونى سىناپ جاتقانىن نەمەسە سونداي قورقىنىشتى نارسەلەر كورسە، ازاڭدا سايلاۋ وتكىزۋگە بۇيرىق بەرىپ، پارلامەنتتى تاراتىپ جىبەرەدى. ەشكىم وعان قارسى تۇرا المايدى، ويتكەنى بىزدە ديكتاتورلىق جۇيە"، - دەدى ساياساتكەر. 

ۆيدەو ازاتتىق راديوسىنان الىندى