2019 جىلدىڭ 25 تامىزىندا الماتى قالاسىنىڭ مەدەۋ اۋدانىندا 28 گۆارديالىق-پانفيلوۆشىلار اتىنداعى ساياباقتا جۇزدەگەن الماتىلىقتاردىڭ قاتىسۋىمەن اشىق اسپان استىنداعى "فيتنەس-پارك-مەدەۋ" جاپپاي تاڭەرتەڭگىلىك دەنە-شىنىقتىرۋ شاراسى ءوتتى دەپ حابارلايدى Qamshy.kz اقپارات اگەنتتىگى.
حالىقتى تۇراقتى تۇردە سپورتپەن شۇعىلدانۋعا باۋلۋ جانە جاستار اراسىندا سالاۋاتتى ءومىر سالتىن ناسيحاتتاۋ ماقساتىندا مەدەۋ اۋدانى اكىمدىگىنىڭ ۇيىمداستىرۋىمەن وتكەن تاڭەرتەڭگىلىك جاپپاي جاتتىعۋعا 6 جاستان باستاپ 85 جاسقا دەيىنگى قالا تۇرعىندارى مەن قوناقتارى قاتىستى.
سپورتتىق شارا قاتىسۋشىلارى الدىمەن ارمرەسلينگ، يوگا، دجامپينگ، كروسسفيت، دجيۋدجيتسۋ، بوكس سىندى سپورت تۇرلەرىنەن ۇيىمداستىرىلعان كاسىبي سپورتشىلاردىڭ شەبەرلىك سىنىپتارىنا قاتىستى. شاراعا برازيليادان كەلگەن ارنايى قوناق دجيۋدجيتسۋ بويىنشا الەم چەمپيونى، برازيليا چەمپيونى، قارا بەلبەۋ يەگەرى ەريكلي سيلۆا قاتىسىپ، جاس سپورتشىلارعا ەرەجەسىز جەكپە-جەكتىڭ قىر-سىرىن ۇيرەتتى.
شارا سوڭى ارنايى شاقىرىلعان جاتتىقتىرۋشىلاردىڭ جەتەكشىلىگىمەن ءبىر مەزەتتە جاسالعان تاڭەرتەڭگىلىك جاتتىعۋعا ۇلاستى. .
بەلسەندى قاتىسۋشىلارعا قالامىزدىڭ "FIGHT CLUB KZ"، "Adrenaline"، "IDOL"، "اۋرا" يوگا جاتتىعۋ زالدارىنا تەگىن جولدامالار تاراتىلدى.
ۇيىمداستىرۋشىلاردىڭ ايتۋىنشا شارا ءوز جالعاسىن تابادى، كەلەسى اشىق اسپان استىنداعى تاڭەرتەڭگىلىك جاتتىعۋ 2019 جىلدىڭ 15 قىركۇيەگىندە ورتالىق مادەنيەت جانە دەمالىس ساياباعىنداعى "سپارتاك" ستاديونىندا وتەدى.
پىكىر قالدىرۋ