سەنبى، 24 تامىزدا اتىراۋ وبلىسىنىڭ باسشىسى قالاداعى كۇردەلى جوندەۋدەن وتكىزىلىپ جاتقان مەكتەپتەر مەن نۇرسايا جانە بەرەكە ىقشاماۋداندارىنداعى ۇيلەردىڭ قۇرىلىسىمەن تانىسىپ شىقتى، – دەپ حابارلايدى وڭىرلىك كوممۋنيكاسيالار قىزمەتى.

قازىرگى تاڭدا اپاتتى ۇيلەردىڭ سانى 71 بولسا، تاعى 12 جاتاقحانا بار. وسى جاتاقحانالارداعى تۇرعىنداردى كوشىرۋ ماقساتىندا ءقازىر نۇرسايا مەن بەرەكە ىقشام اۋداندارىندا 240 پاتەرلىك 6 كوپقاباتتى ءۇيدىڭ قۇرىلىسى ءجۇرىپ جاتىر. نۇرلان نوعايەۆ مەردىگەر كومپانيالارعا قۇرىلىس جۇمىستارىن ۋاقىتىلى ءارى ساپالى ەتىپ جاساۋدى تاپسىردى. جاڭا پاتەرلەر ءۇي يەلەرىنە زاڭ اياسىندا تاپسىرىلاتىن بولادى.

ارى قاراي ايماق باسشىسى كۇردەلى جوندەۋدەن وتكىزىلىپ جاتقان ەكى مەكتەپكە باردى. سولاردىڭ ءبىرى – 1973 جىلى سالىنعان، سودان بەرى جوندەۋ جۇمىستارى جاسالماعان ا.س.پۋشكين اتىنداعى مەكتەپ-ليسەي. ەكىنشىسى – ج.قاراجىگىتوۆ اتىنداعى مەكتەپ-ليسەي، بۇل عيمارات تا 1984 جىلى جىلى سالىنعان، ودان بەرى جوندەۋ كورمەگەن. ەكى مەكتەپتەدە ەدەن، ەلەكتر سىمدارى مەن تەرەزەلەرى تولىقتاي جاڭارتىلدى.

اتىراۋ قالالىق ءبىلىم ءبولىمى قىزمەتكەرلەرىنىڭ ايتۋىنشا، 1 قىركۇيەكتە بارلىق مەكتەپ دايىن بولا قويمايدى. دەگەنمەن وعان اتا-انالار تۇسىنىستىكپەن قاراپ، باستىسى جوندەۋ جۇمىستارىنىڭ ساپالى بولۋىن سۇراپ وتىر.

– مەكتەپتەردەگى كۇردەلى جوندەۋ جۇمىستارى وقۋ پروسەسىنە كەدەرگى كەلتىرمەۋى ءتيىس، – دەدى ايماق باسشىسى. – بۇل تۇستا اتا-انالاردىڭ تۇسىنىستىكپەن قاراۋى قۋانتارلىق جاعداي. اسىعىستىق قاجەت ەمەس، ولار دۇرىس ايتادى. ەكىنشى جاعىنان بالالارعا وقۋ كەزىندە ىڭعايسىزدىق بولماۋى ءتيىس. ءبىلىم باسقارماسى مەن قالالىق اكىمدىك وسى ماقساتتا بارىنشا جۇمىس ىستەۋى كەرەك.

ايتا كەتەيىك، قازىرگى تاڭدا وبلىستا 12 مەكتەپكە جوندەۋ جۇمىستارى جۇرگىزىلىپ جاتىر. ولاردىڭ تورتەۋى قالادا ورنالاسقان. سونىمەن قاتار، بيىل وبلىستا 11 مەكتەپتىڭ قۇرىلىسى باستالدى، بۇدان باسقا 5 مەكتەپتىڭ قۇرىلىسى قازىرگى تاڭدا سالىنىپ ءبىتتى.