جۋرناليست، فيلوسوفيا عىلىمىنىڭ كانديداتى بولاتبەك تولەپبەرگەن «شالقار» راديوسىنىڭ ديرەكتورى بولىپ تاعايىندالدى.

بولاتبەك تولەپبەرگەن كورپەباي ۇلى  1974 جىلى جامبىل وبلىسى سارىسۋ اۋدانى «جايىلما» اۋىلىندا دۇنيەگە كەلگەن. 1991 جىلى اۋىلداعى ورتا مەكتەپتى كۇمىس مەدالعا ءبىتىرىپ، 1991-1996 جىلدارى ءال-فارابي اتىنداعى قازۇۋ-دىڭ جۋرناليستيكا فاكۋلتەتىن تامامداعان.

ەڭبەك جولىن 1992-1994 جىلدارى «وركەن» جانە «جاس الاش» گازەتتەرىنىڭ ءتىلشىسى بولىپ باستاعان. 1994-1996 جىلدارى «قازاق ادەبيەتى» گازەتىنىڭ ءبولىم مەڭگەرۋشىسى،1996-1998 جىلدارى «زەردە» جۋرنالى باس رەداكتورىنىڭ ورىنباسارى،1998-2000 جىلدارى «جالىن» جۋرنالى باس رەداكتورىنىڭ ورىنباسارى، 2000-2001 جىلدارى «اسار» جاستار گازەتىن ۇيىمداستىرۋشى، باس رەداكتورى، 2002-2005 جىلدارى «جۋرناليست» گازەتىنىڭ رەداكتورى بولدى. 2010 جىلى فيلوسوفيا عىلىمدارىنىڭ كانديداتى عىلىمي دارەجەسىن قورعاعان.

ۇلتتىق ماسەلەلەر، تاريحي اقتاڭداقتار جانە دەموكراتيا پرينسيپتەرى تۋراسىندا ءوز اۆتورلىعىمەن جانە قۇراستىرۋىمەن ون بەس كىتاپتى جارىققا شىعارعان. 2004 جىلى «كوشكەن كۇننىڭ بوياۋى» پۋبليسيستيكالىق كىتابى، 2006 جىلى «ءبىز بىلمەيتىن جەلتوقسان» كىتابى، 2006 جىلى «جەلتوقسان-86» ون تومدىق ەستەلىكتەر، قۇجاتتار، ماقالالار جيناعى" (قۇراستىرۋشى اۆتورى)، 2007 جىلى «1937-2007:تاۋقىمەت پەن تاعزىم» جيناعى، 2008 جىلى «ماڭگى جاس الاش يدەياسى» كىتابى، 2009 جىلى «ۇلتىم دەپ سوققان جۇرەكتەر» جيناعى، 2010 جىلى «جەلتوقسان قارلىعاشتارى» كىتابى، 2011 جىلى «ۇلتتىق يدەيا – تاۋەلسىزدىك تۇعىرى» كىتابى، 2012 جىلى «قاسيەتتىم-جەلتوقسان!» جانە 2015 جىلى «ءبىز وسى نە ءبىتىرىپ ءجۇرمىز؟» كىتاپتارى جارىق كوردى.

سونداي-اق 2008 جىلى ونىڭ جەتەكشىلىگىمەن ەلدەگى ورالمان اعايىندار جايلى «سۇيىكتى مەنىڭ وتانىم» اتتى دەرەكتى فيلم كورەرمەنگە جول تارتتى.

بولاتبەك تولەپبەرگەن - قازاقستان جازۋشىلار وداعى مەن «اتامۇرا» كورپوراسياسىنىڭ جازۋشى ورالحان بوكەي اتىنداعى ستيپەندياسىنىڭ تۇڭعىش يەگەرى (1993)، «سوروس-قازاقستان» جاس جازۋشىلار بايگەسىنىڭ جۇلدەگەرى (1996)، قازاقستان جاستار وداعى سىيلىعىنىڭ لاۋرەاتى (2003)، «استانانىڭ 10 جىلدىعى» مەرەكەلىك مەدالىنىڭ يەگەرى (2008)، مەملەكەتتىك «دارىن» جاستار سىيلىعىنىڭ لاۋرەاتى (2008) جانە ق ر مادەنيەت قايراتكەرى (2009) جانە ق ر پرەزيدەنتىنىڭ جۋرناليستيكا سالاسى بويىنشا سىيلىعىنىڭ لاۋرەاتى (2011). قازاقستان جازۋشىلار وداعى مەن جۋرناليستەر وداعىنىڭ مۇشەسى.