كونستيتۋسيا كۇنى قارساڭىندا اتىراۋدا «ق ر كونستيتۋسياسى: بىرلىك، تۇراقتىلىق جانە وركەندەۋ» اتتى رەسپۋبليكالىق عىلىمي-پراكتيكالىق كونفەرەنسيا ءوتتى.

شارانى باستاپ اشقان ق ر كونستيتۋسيالىق كەڭەسىنىڭ مۇشەسى ءۇنزيلا شاپاق ەلىمىزدىڭ باستى قۇجاتىنىڭ بارلىق قازاقستاندىقتار ءۇشىن ماڭىزىن اتاپ ءوتتى.

قازاقستان رەسپۋبليكاسىنىڭ كونستيتۋسياسى 1995 جىلعى 30 تامىزدا جالپىۇلتتىق رەفەرەندۋمدا قابىلدانىپ، وعان بەس رەت وزگەرىستەر ەنگىزىلدى: 1998، 2007، 2011، 2017 جىلدارى جانە 2019 جىلى.

قولدانىستاعى كونستيتۋسيا تاۋەلسىز قازاقستاننىڭ تاريحىنداعى ەكىنشى رەت قابىلدانعان وسىنداي قۇجات. ءبىرىنشىسى 1993 جىلى قابىلدانعان بولاتىن.

كونستيتۋسيا قازاقستان حالقىنىڭ ەلىمىزدى دەموكراتيالىق، زايىرلى، قۇقىقتىق جانە الەۋمەتتىك مەملەكەت رەتىندە بەكىتۋگە دەگەن ۇمتىلىسىن، جىگەرىن بەينەلەيدى. ەڭ باستىسى، نەگىزگى زاڭىمىز قازاقستاندىقتارعا تاڭداۋ جاساۋ قۇقىعىن بەردى.

ەلىمىزدىڭ ءار ازاماتىنىڭ قۇقىقتارى مەن بوستاندىقتارىن قامتاماسىز ەتەتىن ادىلەتتى سوت اتقارۋدىڭ كەپىلى كونستيتۋسيا ەكەنىن اتاپ وتكەن اتىراۋ وبلىستىق سوتىنىڭ ءتوراعاسى مارعۇلان بەكتەمىروۆ، كونستيتۋسياعا ەنگىزىلگەن سوڭعى وزگەرىستەر سوت-قۇقىق قورعاۋ جۇيەسىنىڭ دامۋىنا وڭ ىقپال ەتكەنىن ايتتى. 

كونفەرەنسياعا قاتىسۋشىلاردىڭ پىكىرىنشە، ەلىمىزدىڭ كونستيتۋسياسىن جالپىمەملەكەتتىك، جالپىۇلتتىق جانە جالپىازاماتتىق قولداۋ شارالارىنىڭ جۇيەسى قاجەت. كونستيتۋسيالىق جاڭعىرۋ جاي عانا ءماتىندى تۇزەتۋ، كونستيتۋسيا نورمالارىنىڭ مازمۇنىن ءتۇسىندىرۋ ەمەس. بۇنىڭ ءمانى – كونستيتۋسيالىق نورمالاردى ودان ءارى ناقتى مازمۇنمەن تولتىرۋ ءۇشىن ءاربىر مەملەكەتتىك ورگان، ازاماتتىق قوعامنىڭ ينستيتۋتتارى مەن ازاماتتارى تۇراقتى جۇمىستانۋى قاجەت. 

كونفەرەنسياعا قاتىسقان اتىراۋ وبلىسى اكىمى نۇرلان نوعايەۆ قوعامنىڭ كونستيتۋسيالىق مادەنيەتىن كوتەرۋگە قاتىستى كوپتەگەن ماسەلەلەردى تالقىلاۋ مۇمكىندىگى ءۇشىن ۇيىمداستىرۋشىلار مەن قاتىسۋشىلارعا ريزاشىلىعىن ءبىلدىردى. كونستيتۋسيانىڭ پروتوتيپتەرى قازاق حالقىندا بۇرىن دا بولعانىن ايتا كەتۋ كەرەك. نەگىزگى زاڭنامالىق نورمالاردىڭ ءبىرىڭعاي جيناعىنىڭ نەعۇرلىم ايقىن ۇلگىلەرى – قازاق حاندىعىندا قولدانىستا بولعان «جەتى جارعى» جانە «تاۋكە حاننىڭ زاڭدارى». اتاقتى تولە بي، قازىبەك بي، ايتەكە بي جاساقتاعان بۇل زاڭدار جيناعى قازاق حاندىعىنداعى قوعام ءومىرىنىڭ بارلىق سالالارىن دەرلىك رەتتەپ وتىرعان.

–  تاۋەلسىزدىك تاڭىندا ەلىمىزگە ازاماتتاردىڭ قۇقىقتارى مەن بوستاندىقتارىن قورعايتىن قۇجات قاجەت بولدى. سول كەزدە ەلباسى – قازاقستاننىڭ تۇڭعىش پرەزيدەنتىنىڭ باستاماسىمەن 1995 جىلى جالپىۇلتتىق رەفەرەندۋمدا كونستيتۋسيامىز قابىلداندى. ەلىمىزدىڭ باستى قۇجاتىنىڭ، سونىڭ اياسىندا وسى جىلدارى قابىلدانعان زاڭداردىڭ ارقاسىندا قازاقستان بيىك بەلەستەردى يگەردى. بۇگىنگى كونفەرەنسيا كونستيتۋسيانىڭ بولاشاق مۇمكىندىكتەرى تۋرالى پىكىر الماسىپ، وي ءبولىسۋ تۇرعىسىنان پايدالى بولدى. بۇل ەلىمىزدىڭ باستى قۇجاتىنىڭ جاڭا مۇمكىندىكتەرىن اشىپ، كورسەتۋگە مۇمكىندىك بەرەدى ، – دەپ اتاپ ءوتتى نۇرلان نوعايەۆ.