ماڭعىستاۋ وبلىسىنىڭ قاراقيا اۋدانىنا قاراستى سەنەك اۋىلىندا حالىق يگىلىگىنە قوس نىسان بەرىلدى. ءبىرى تۇرعىنداردى اۋىز سۋمەن قامتاماسىز ەتەتىن سۋ رەزەرۆۋارى بولسا، ەكىنشىسى اۋىلدا العاش رەت سپورت مەكتەبى اشىلدى.
مەملەكەتتىك قارجى ەسەبىنەن سالىنعان رەزەرۆۋارلار مەن سۋ سورعىلاۋ ستانسياسىنىڭ قۇرىلىسى وتكەن جىلى تامىز ايىندا باستالعان بولاتىن. عيمارات سورعى، وپەراتور بولمەسى، تۇرمىستىق جانە سانيتارلىق ورىنداردان تۇرادى. ەكى رەزەرۆۋاردىڭ ءارقايسىسىنىڭ كولەمى 500 تەكشە مەتردى قۇرايدى.
- ءبىز اۋىل تۇرعىندارىن اۋىز سۋىمەن ءتورت تاۋلىك بويىنا ءۇزىلىسسىز قامتاماسىز ەتە الامىز. سۋ سورعىلاۋ ستانسياسىندا 4 سورعى ورنالاسقان، ءارقايسىسى ساعاتىنا 37 تەكشە مەتر سۋ ايداۋعا دايىن. سۋ تاسيتىن 3 تەحنيكا بار، سونداي-اق، 12 ادامدى جۇمىسپەن قامتاماسىز ەتىپ وتىرمىز، - دەپ اتاپ ءوتتى «AY-Service LTD» ج ش س مەردىگەر مەكەمەسىنىڭ ديرەكتورى ءالىپ ەلۋبايەۆ.
ال جاڭادان بوي كوتەرگەن سپورت عيماراتىندا جاستار شاعىن فۋتبول، ۆولەيبول، باسكەتبول جانە جەكپە جەك تۇرلەرىمەن اينالىساتىن بولادى.
ماڭعىستاۋ وبلىسىنىڭ اكىمى سەرىكباي ترۇموۆ تۇرعىنداردى مەرەكە قارساڭىنداعى قوس قۋانىشتارىمەن قۇتتىقتاپ، اۋىلدىڭ سپورتسۇيەر جەتكىنشەكتەرىنىڭ ارمانىن ورىنداۋعا مۇرىندىق بولعان «نورد كاسپيان وپەرەيتينگ كومپانياسىنا» ءوزىنىڭ العىسىن جەتكىزدى.
- بۇگىنگى اشىلىپ وتىرعان نىسان مەرەكە قارساڭىندا اۋىل تۇرعىندارىنا ۇلكەن تارتۋ بولىپ وتىر. بۇل سپورت عيماراتى – قايماعى بۇزىلماعان، سالتى مەن ءداستۇرىن ساقتاي بىلگەن، ۇلتتىق تاربيەمەن سۋسىنداعان اۋىل جاستارىنىڭ ارمانىنا قانات ءبىتىرىپ، ەلىمىزدىڭ ابىرويىن اسقاقتاتار سپورتشىلار تاربيەلەۋدە مول سەپتىگىن تيگىزىپ، حالىق يگىلىگىنە قىزمەت ەتەدى دەپ ويلايمىن. مەنىڭ بىلۋىمشە بۇقارالىق سپورت تۇرىنەن وسى اۋىلدىڭ جاستارى دا بيىك بەلەستەردى باعىندىرىپ، جارىستاردا جۇلدەلى ەكەن. الداعى ۋاقىتتا وسى مەكتەپتەن جاتتىققان جاسوسپىرىمدەر اراسىنان دا بولاشاق چەمپيوندار شىعاتىنىنا سەنىمدىمىن، - دەدى ايماق باسشىسى.