الماتى وبلىسى قاراساي اۋدانى رايىمبەك اۋىلىندا گازبەتوندى بلوك شىعاراتىن كاسىپورىندا جويقىن جارىلىس بولدى دەپ حابارلايدى Qamshy.kz اقپارات اگەنتتىگى. بۇل تۋرالى ءىىم توتەنشە جاعداي كوميتەتى حابارلادى.
سالدارىنان ءبىر ەر ادام قازا تاۋىپ، تاعى ۇشەۋى ءتۇرلى جاراقاتپەن اۋرۋحاناعا جاتقىزىلدى. وقيعا كەشە ساعات ون ەكىلەر شاماسىندا بولعان.
"الماتى وبلىسى تجد كەزەكشىلىك پۋلتىنە قاراساي اۋدانىنا قاراستى رايىمبەك اۋىلىندا گازبەتوندى بلوك سەحىندا جارىلىس بولعانى تۋرالى حابار ءتۇستى. جوعارى قىسىمنان اۆتوكلاۆ جارىلىپ، جارىلىستان سەح ءىشىنارا بۇزىلعان"، - دەلىنگەن حابارلامادا.
جويقىن جارىلىستان ءتۇتىن شىعاراتىن قۇبىردىڭ سىنىقتارى جەكە تۇرعىن ءۇي سەكتورىنىڭ اۋماعىنا ۇشقان.
پوليسەيلەر مەن وبلىستىق تجد قىزمەتكەرلەرى وقيعا ورنىنان 58 جاستاعى ەر ادامنىڭ دەنەسىن تاپتى. تاعى ءۇش ادام ءتۇرلى جاراقاتپەن اۋرۋحاناعا ءتۇستى.
بۇدان بولەك، سەحقا جاقىن ماڭدا تۇراقتا تۇرعان بىرنەشە اۆتوكولىككە زيان كەلدى.
پىكىر قالدىرۋ