بەلگىلى ينۆەستور، قوعام بەلسەندىسى مارعۇلان سەيسەمباي قازاقستان پرەزيدەنتى قاسىم-جومارت توقايەۆتىڭ حالىققا جولداۋىندا "ەرەكشە اتاپ وتۋگە تۇراتىن جانە ساياسي تەزيستەرگە قاتىستى بەس ماسەلە بار" ەكەنىن ايتتى دەپ جازادى Qamshy.kz اقپارات اگەنتتىگى. بۇل تۋرالى سەيسەمباي ءوزىنىڭ Facebook پاراقشاسىندا جازدى. 

"بىردەن ەسكەرتەيىن، جولداۋ كوڭىلىمنەن شىقپاسا دا، نەگاتيۆكە سالىنبايمىن. سىرتتاي ءوز رەاكسيامدى وبەكتيۆتى تۇردە ايتۋعا تىرىسايىن. سونىمەن، مەنىڭ ويىمشا، جولداۋدا ەرەكشە اتاپ وتۋگە تۇراتىن جانە ساياسي تەزيستەرگە قاتىستى بەس ماسەلە بار.

1.الەمدىك تاجىريبە كورسەتىپ وتىرعانداي، بۇزىپ-جارعىش ساياسي ليبەراليزاسيا تۇراقسىزدىققا اكەپ سوعادى. سوندىقتان ءبىز ساياسي رەفورمالاردى العا اتتانداۋمەن ەمەس، ويلاستىرىپ وتىرىپ جۇرگىزەمىز. بۇعان كەلىسەرمىن، ءبىراق بۇل ونسىز دا جوعالتىپ العان قانشاما ۋاقىتىمىزدى تاعى دا وتكىزۋ بولماسا يگى ەدى.

2. "ءبىزدىڭ ءپرينسيپىمىز – ساياسي مودەرنيزاسياسىز ەكونوميكالىق رەفورمالاردى جۇرگىزۋ مۇمكىن ەمەس"، – دەدى پرەزيدەنت.
مىنە، بۇعان 100% كەلىسەمىن، ءتىپتى 500%!

3. "زاڭدا بەلگىلەنگەن تارتىپكە ساي، ولارعا (ميتينگ) وتكىزۋگە رۇقسات بەرۋ، ول ءۇشىن ارنايى ورىن بەلگىلەۋ. الايدا، ول قالا سىرتىندا بولماۋى كەرەك"، – دەدى. تۇتاستاي العاندا، ىلگەرىلەۋ بايقالادى، ءبىراق، مەنىڭشە، ميتينگىلەر ەسكەرتۋشى سيپاتتا ءوتۋى كەرەك. سونداي-اق، ميتينگىنى ۇيىمداستىرۋشىلار ءوز قاۋىپسىزدىگى ءۇشىن الاڭدايتىن بولسا، ونى حابارلاۋى ءتيىس.

4. "پوليسيانىڭ مەملەكەتتىڭ كۇش قۇرالى رەتىندەگى بەينەسى بىرتىندەپ كەلمەسكە كەتەدى. ول ازاماتتاردىڭ قاۋىپسىزدىگىن قامتاماسىز ەتۋ ءۇشىن قىزمەت كورسەتەتىن ورگانعا اينالادى".
مىنە، تاعى دا 100، 500% كەلىسەمىن! مەن تەك «بىرتىندەپ» دەگەن ءسوزدىڭ كۇنتىزبەگە قويىلعانىن جانە ناقتى مەرزىمىن ەستىگىم كەلەدى.

5. "الداعى ءماجىلىس پەن ءماسليحات سايلاۋى ەلىمىزدەگى كوپپارتيالى جۇيەنىڭ ودان ءارى دامۋىنا سەپ بولۋى كەرەك".
نە بۇل؟ جاڭا پارتيانى تىركەۋدى جەڭىلدەتۋ جونىندەگى ۋادەسى مە، الدە تەك سايلاۋعا سەپ بولۋعا «ءتيىس» دەگەن تىلەگى عانا ما؟ ءوز باسىم بۇل ءسوزدى تۇسىنبەدىم.

جالپى - وسىلار. قالعانىنىڭ ءبارى ءومىرىمىزدىڭ جاعىمسىز ساتتەرىنە بايلانىستى حالىقتىڭ الەۋمەتتىك جەلىلەردەگى رەاكسياسىنا بەرگەن جاۋابى جانە ماسەلەلەردى اقشامەن تولتىرۋ عانا. دەسە دە، مۇنىڭ ءوزى جامان ەمەس. بۇل - ەڭ بولماعاندا، بيلىكتىڭ الەۋمەتتىك جەلىلەردەگى نارازىلىقتاردى ەستي باستاعانىن كورسەتەدى"، - دەپ جازدى سەيسەمباي فەيسبۋك پاراقشاسىندا. 

بۇگىن، 2 قىركۇيەكتە قازاقستان پرەزيدەنتى قاسىم-جومارت توقايەۆ حالىققا جولداۋ جولدادى. توقايەۆتىڭ جولداۋى "سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى" دەپ اتالدى.