قۋات اۋەسباي، «تۇركىستان» حالىقارالىق گازەتىنىڭ باس رەداكتورى:
- مەملەكەت باسشىسى ق.توقايەۆتىڭ العاشقى جولداۋىنان قازاق جۋرناليستيكاسىنىڭ قازىعى قاعىلعان الماتىداعى قالامگەر قاۋىم جىلى قابىل الدى. جولداۋ جاريالانعاننان كوپ وتپەي «تۇركىستان» گازەتىنىڭ جانىنداعى «الداسپان» پىكىرسايىس الاڭىندا ءبىر توپ الماتىلىق ءجۋرناليستىڭ باسىن قوسىپ، جولداۋدا ءمان بەرىلگەن باسىم باعىتتاردى تالقىعا سالىپ، وي ەلەگىنەن وتكىزدىك. جيىنعا قاتىسۋشىلاردى جولداۋدا الەۋمەتتىك ماسەلەلەرگە كوپ باسىمدىق بەرىلىپ وتىرعانى ەرەكشە قۋانتتى. پرەزيدەنتتىڭ سايلاۋالدى باعدارلاماسىندا دا بۇل ماسەلەلەرگە ەرەكشە توقتالعان بولاتىن. جالپى ايتقاندا، حالىقتىڭ كوكەيىندە جۇرگەن، الاڭ تۋدىرعان تۇيىتكىلدەردى مەملەكەت باسشىسى ءدوپ باسىپ، ولاردىڭ الداعى ۋاقىتتا مىندەتتى تۇردە ءوز شەشىمىن تاباتىنىنا ۋادە ەتتى. ەل سەنىمىن نىقتاي ءتۇسۋ ءۇشىن جىل سوڭىندا اتقارىلعان ىستەردىڭ قورىتىندى ەسەبى بولار دەپ ۇمىتتەنەمىز.
پرەزيدەنتتىڭ «قازاق حالقىنىڭ مەملەكەت قۇراۋشى ۇلت رەتىندەگى ءرولىن بەكەمدەپ، ەتنوسارالىق تاتۋلىق پەن ءدىنارالىق تۇسىنىستىكتى قالىپتاستىرا بەرۋىمىز قاجەت» دەگەن ءسوزى كوپ كوكەيىنەن شىعۋدا. سونداي-اق، «قازاق ءتىلىنىڭ مەملەكەتتىك ءتىل رەتىندەگى ءرولى كۇشەيىپ، ۇلتارالىق قاتىناس تىلىنە اينالاتىن كەزەڭى كەلەدى» دەي كەلە، تەك مۇنداي نازىك ماسەلەدە داڭعازا جاساماي، جۇمىلا جۇمىس ىستەۋىمىز كەرەك ەكەنىن ەسكەرتتى. سول سياقتى جەرىمىزدىڭ شەتەلدىكتەرگە ەشقاشان ساتىلمايتىنى تۋرالى پىكىرى دە كوپتەن بەرى ەلدى ەلەڭدەتىپ قويعان ماسەلەگە نۇكتە قويعانداي بولدى.
پىكىر قالدىرۋ