ءماجىلىس دەپۋتاتى ۆلاديمير بوجكو قازاقستاندىقتار بيلىكتىڭ الدىندا تىزەرلەپ تۇرىپ، العىس ايتۋ كەرەك دەپ ەسەپتەيدى دەپ جازادى Qamshy.kz اقپارات اگەنتتىگى. بۇل تۋرالى دەپۋتات كەشە وتكەن قازاقستان حالقى اسسامبلەياسى كەڭەسىنىڭ كەڭەيتىلگەن وتىرىسىندا ايتتى.
"بيلىكتىڭ نە ىستەپ جاتقانىن كورىپ، تۇسىنىستىك تانىتۋ كەرەك. ءيا، ءبىر عانا دەرەك بويىنشا - ءۇش جىل ىشىندە حالىقتىڭ الەۋمەتتىك قولداۋى 17 ەسە ءوستى. بۇل ءۇشىن، كەشىرىڭىز مەنى، قازاقستاندىقتار بيلىككە تىزەرلەپ تۇرىپ، ريزاشىلىعىن ءبىلدىرۋى كەرەك"، - دەدى بوجكو.
دەپۋتاتتىڭ بۇل مالىمدەمەسى كوپشىلىكتىڭ نارازىلىعىن تۋدىردى. تانىمال اكتەر نۇرتاس ادامباي دا دەپۋتاتتى سىنعا الدى.
"دەپۋتات بوجكو، ەگەر ءسىز مەملەكەتتىك كومەك «17 ەسە وسسە» ءتيىمدى بولىپ، وندا كومەككە مۇقتاج وتباسىلار سانى بۇگىندە ازداۋ بولار ەدى دەپ ويلامادىڭىز با؟ ادامدار جاعدايى جاقسى بولعاندىقتان كومەك سۇرادى دەپ ەسەپتەيسىز بە؟ از قامتىلعان وتباسىلاردىڭ جاعدايىن ءوز كوزىڭىزبەن كوردىڭىز بە؟ حالىق بيلىك الدىندا تىزەرلەپ تۇرىپ العىس ايتۋ كەرەك پە؟ سەنىمدىسىز بە؟ جالپى مەملەكەتتىك قىزمەتكەر ءوزى مۇددەلەرىن قورعاۋعا ءتيىستى ادامدارعا قاتىستى وسىنداي پىكىر ءبىلدىرۋى دۇرىس پا؟ زەينەتكە شىعاتىن كەز كەلمەدى مە، بوجكو؟"، - دەپ جازدى نۇرتاس ادامباي ءوزىنىڭ فەيسبۋك پاراقشاسىندا.
پىكىر قالدىرۋ