پاۆلودار قالالىق قىلمىستىق ىستەر جونىندەگى سوت اپ-162/3 مەكەمەسىندەگى 2016 جىلعى "ازاپتاۋ ىسىنە" بايلانىستى ۇكىم شىعاردى. سۋديا جۇلدىز تىلەگەنوۆا 14 ايىپتالۋشىنى بەس جانە جەتى جىل ارالىعىندا باس بوستاندىعىنان ايىردى. 14 ايىپتالۋشىنىڭ كوبى - جالپى رەجيمدەگى جەرگىلىكتى كولونيانىڭ بۇرىنعى قىزمەتكەرلەرى، ايىپتالۋشىلار اراسىندا سونىمەن بىرگە بىرنەشە سوتتالۋشى جانە تۇرمەدە جازاسىن وتەگەن ادامدار (اتالعان ەكى توپ تا تۇرمە اكىمشىلىگىنە كومەكتەسكەن دەپ ايتىلادى) دا بار. بۇعان دەيىن ءۇيقاماقتا بولىپ كەلگەن سەگىز ادام: كولونيانىڭ بۇرىنعى قىزمەتكەرلەرى جانە ەكى بۇرىنعى سوتتالۋشى سوت زالىندا قاماۋعا الىندى دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ.
پروكۋرور ەلەنا بەلوۆا 29 تامىزدا وتكەن جارىسسوزدە ايىپتالۋشىلاردى ءۇش پەن التى جىل ارالىعىندا سوتتاۋدى سۇراعان ەدى.
بۇل ءىس بويىنشا باستاپقىدا 16 ايىپتالۋشى بولعان: ونىڭ 10-ى - تۇرمەنىڭ بۇرىنعى قىزمەتكەرى، ۇشەۋى - سوتتالۋشى، ۇشەۋى - بۇرىنعى تۇتقىن. سوت اياقتالعانعا دەيىن مەكەمە باستىعىنىڭ تاربيە جونىندەگى بۇرىنعى ورىنباسارى 44 جاستاعى مايور ۆيتالي گاجالو جانە مەكەمەنىڭ بۇرىنعى شارۋاشىلىق ءبولىمىنىڭ جەتەكشىسى ا.پودليپالين قايتىس بولدى. 4 قىركۇيەكتە شىققان سوت ۇكىمى بويىنشا گاجالو كىنالى بولىپ تانىلدى، ءبىراق قايتىس بولعاندىقتان جازادان بوساتىلدى. ۇكىم كەزىندە ءپودليپاليننىڭ ءاتى-جونى اتالمادى، سەبەبى سوت ءجۇرىپ جاتقان كەزدە ونىڭ قايتىس بولۋىنا بايلانىستى ءىسى توقتاتىلعان.
ۇكىمنەن بولەك، سۋديا تىلەگەنوۆا ەكى جەكە سوت قاۋلىسىن شىعاردى: بىرەۋى - باس پروكۋراتۋرا، ەكىنشىسى - ەرسايىن نۇرتازينوۆقا باعىتتالعان. نۋرتازينوۆ 2016 جىلى پاۆلودار وبلىستىق قىلمىستىق اتقارۋ جۇيەسى دەپارتامەنتىنىڭ باستىعى بولعان. 2019 جىلى قاڭتار ايىندا شىعىس قازاقستان وبلىسىنا اۋىسقان.
قىلمىستىق ءىس ەكى ەپيزودتان قۇرالعان. العاشقى ەپيزود 2016 جىلى اقپان ايىندا تۇرمەدە كوز جۇمعان باقىتجان ابدىكارىموۆتىڭ ولىمىمەن بايلانىستى. بۇل ەپيزود بويىنشا جابىرلەنۋشى رەتىندە سوتقا ابدىكارىموۆتىڭ تۋىستارى: ونىڭ اپكەسى نۇرلىگۇل دەمپستەر جانە باۋىرى جاندوس ابدىكارىموۆ قاتىستى.
سوت ۇكىمى وقىلعان سوڭ جاندوس ابدىكارىموۆ ازاتتىققا شاعىمدى اپەللياسياعا تۇسىرەتىنىن ايتتى، ول باۋىرى "تۇرمەدە وز-وزىنە قول سالعان جوق، ونى ءولتىردى" دەپ ەسەپتەيدى.
ەكىنشى ەپيزود 27 جاستاعى سايىن مۇراتبەكوۆتىڭ ولىمىمەن بايلانىستى. ول كولونياعا 2016 جىلى 17 ماۋسىمدا تۇسكەن جانە كەلەسى كۇنى كوز جۇمعان. الدىن الا دەرەك بويىنشا، ونى تۇرمەدە ۇرىپ-سوققان. بۇل ەپيزود بويىنشا جابىرلەنۋشى رەتىندە سوتتالۋشىنىڭ اكەسى قىلىشباي مۇراتبەكوۆ سوتقا قاتىستى. بۇعان قوسا، 2016 جىلى 18 ماۋسىمعا قاراعان ءتۇنى بالقاش كولونياسىنان ەتاپپەن وسىندا جەتكىزىلگەن 26 سوتتالۋشىنىڭ 25ء-ى جابىرلەنۋشى رەتىندە سوتقا قاتىستى. ءقازىر بۇل 25 سوتتالۋشىنىڭ كوبى بوساتىلعان. ولار سوت پروسەسىنە ءتۇرلى ايماقتاردان ۆيدەوبايلانىس ارقىلى قوسىلىپ، قاتىسىپ ءجۇردى.
حالىقارالىق قۇقىق قورعاۋ ۇيىمدارى مەن باتىس ەلدەرىنىڭ ۇكىمەتتەرى قازاقستاندى بىرنەشە رەت تۇرمەدەگى ازاپتاۋدى جويۋعا شاقىرعان. ناۋرىز ايىندا قابىلدانعان ەۋروپارلامەنت رەزوليۋسياسىندا قازاقستاندا "سوتتالۋشىلار مەن كۇدىكتىلەردى ازاپتاعان ادامداردىڭ جازاسىز قالۋى قالىپتى جايتقا اينالىپ بارادى" دەلىنگەن. اقش مەملەكەتتىك دەپارتامەنتى بيىل جاريالاعان ادام قۇقىعى احۋالىنا ارنالعان بايانداماسىندا دا تۇرمەدەگى ازاپتاۋ ماسەلەسىن ايتىپ وتكەن.
پىكىر قالدىرۋ